Уйқуга ётиш олдидан ўқиладиган энг зарур оят ва суралар:

📌 «Оятул-курсий»
Абу Ҳурайра розияллоҳу анҳудан ривоят қилинади: «Расулуллоҳ соллаллоҳу алайҳи васаллам мени Рамазон закотини сақлашга вакил қилдилар. (Тунда) биров келиб дон-дунлардан ҳовучлаб ола бошлади. Мен уни ушлаб олиб: «Сени Расулуллоҳ соллаллоҳу алайҳи васалламнинг ҳузурларига олиб бораман»,– дедим...
Ушбу ҳадиснинг охирида:
У: «Мени қўйиб юбор, сенга Аллоҳ улар билан манфаат берадиган сўзларни ўргатиб қўяман»,– деди.
«Улар қандай сўзлар?» –дедим.
«Жойингга кириб ётганингда, «Оятул-курсий»ни охиригача ўқисанг, Аллоҳ тарафидан сени бир қўриқчи қўриқлаб туради ва тонг отгунча сенга шайтон яқинлашолмайди»,– деди.
Шунда Пайғамбар соллаллоҳу алайҳи васаллам: «У ўзи ўта ёлғончи бўлса ҳам, сизга рост айтибди. Уч кундан бери ким билан гаплашаётганингизни биласизми, эй Абу Ҳурайра?» – дедилар.
Мен: «Йўқ», –дедим.
«У шайтон эди»,– дедилар Набий соллаллоҳу алайҳи васаллам». (Бухорий ривояти)
📌 «Бақара» сурасининг охирги икки ояти
Абу Масъуд ал-Ансорий розияллоҳу анҳудан ривоят қилинган ҳадисда Пайғамбар соллаллоҳу алайҳи васаллам дедилар: «Ким кечқурун "Бақара" сурасининг охирги икки оятини ўқиса, бу унга (ёмонликлардан ҳимояланишига) кифоя қилади».
(Бухорий ва Муслим ривояти)
📌 «Каафируун» сураси
Навфал Ашжаъий розияллоҳу анҳу ривоят қиладилар: «Расулуллоҳ соллаллоҳу алайҳи васаллам менга: «Ухлашга шайланганингда, «Қул йаа аййуҳал каафируун»ни охиригача ўқи, чунки у ширкдан халосликдир», –дедилар». (Абу Довуд ва Термизий ривояти)
📌 «Ихлос», «Фалақ», «Ан-наас» суралари
Оиша розияллоҳу анҳодан ривоят қилинади: «Пайғамбар соллаллоҳу алайҳи васаллам ҳар кеча тўшакларига кирганларида икки кафтларини бирлаштирар, сўнг уларга дам солиб: «Қул ҳуваллоҳу аҳад», «Қул аъуузу бироббил-фалақ», «Қул аъуузу бироббин-наас» сураларини ўқирдилар, сўнг кафтларини баданларининг қодир бўлган еригача сурардилар, бошлари, юзлари ва баданларининг олди тарафидан бошлардилар ва буни уч марта такрорлардилар». (Бухорий ривояти)
Дониёр Файз манбалар асосида тайёрлади