ХАШАГУЛЬГОВ АЛИ

Г1АЛГ1АЙ БАЛА
Дунен т1а моттиг яц
тхо, г1алг1ай, ца кхоачаш,
лаьттан т1а ч1егилг яц
тха, г1алг1ай, т1ехк йоацаш, -
Казахстане дах тхо,
Сибарег1а ма дах,
маца дахаргда-теш
тхо Г1алг1айче, ванаг1!
Ма хила сов къаьра,
ма дувца сел харцдар, -
тхогахьа ва Даьла,
тхогахьа да бакъдар!
Дехац оаха доацар,
оаха ех тхой Даьхе -
даьтт1а дог мо йода
тхой Нана-Г1алг1айче!
Дукха шераш хьалха
даьча мехках даьха,
лелаш да тхо пана,
михоудорг санна...
Дейнад тхона 1аьржа,
лейнад оаха къе 1анз.
Диъ даькъа деха дах
тха з1амига къам х1анз.
Ма хила сов къаьра,
ма дувца сел харцдар, -
тхогахьа ва Даьла,
тхогахьа да бакъдар!
Дехац оаха доацар, -
оаха ех тхоай Даьхе -
даьтт1а дог мо йола
тхоай Нана-Г1алг1айче!
Мел хьежа деза тхо,
мел хьега тха деза!
Безац тхона кхы мохк,
тхона тхоай мохк беза!
Ма г1ерта тха сабар
дохаде, ва 1аьдал! -
1айха даьча вонна
тхона х1анз 1а жоп дел!
Ма хила сов къаьра,
ма дувца сел харцдар, -
тхогахьа ва Даьла,
тхогахьа да бакъдар!
Дехац оаха доацар, -
оаха ех тхоай Даьхе -
даьтт1а дог мо йола
тхой Нана-Г1алг1айче!
11 май, 1990 шу.