Turk seriali dublyajida qatnashganlarga "millat xoini" tamgʻasi urildi
Bir necha Islomiy kitoblar muallifi Ziyovuddin Rahim ayrim xorij seriallariga ovoz berayotganlarning maoshi "harom"ligini aytdi. Bu haqda azon.uz sayti yozib chiqdi. Ulamoning bu gaplari Facebook da bahsu munozaralarga sabab boʻldi.
"Fahsh ishlarga, zinoga chaqiradigan (turkchami, meksikanikimi, balo-battarmi, farqi yoʻq) seriallarga ovoz berish, dublyaj xizmati uchun haq olish haromdir. Kim unga ovoz bersa, harom ish qilibdi, bolasiga harom luqma yediribdi. Oʻsha seriallar efirga uzatilishi yoʻlida ishlaganlar ham harom-nopok ish qilgan boʻladi", degan u.
Ziyovuddin Rahim bunday seriallarga ovoz berayotgan aktyorlarni millatning ashaddiy xoinlari va munofiq, deb atagan.
"Ularni avval ham millat xoinlari deb atagandim. Hozir ham millatning eng ashaddiy xoinlari, buzgʻunchi, ikkiyuzlamachi, munofiq kimsalar deb bilaman. Boshqalarni ham jaholatga, razolatga qarshi kurashishga chaqiraman.
Seriallarni zudlik bilan toʻxtatinglar! Aks holda oxiri yomon boʻladi!
Qardosh Turkiya bilan aloqalarimiz tiklangani yaxshi, albatta. Lekin bu, ularning maʼnan buzuq, yomonlikka undaydigan seriallarini qoʻyish mumkin degani emas. Turklarda ham bor yaxshi, mazmunli seriallar. Nega ular qolib, aynan shahvatparastlikka moyil qiluvchi, oilalar tinchligini buzadigan, imonga, odob-axloqqa rahna soladigan chiqindi seriallar berilmoqda? Buning ortida kimlar turibdi oʻzi? Qani, mard boʻlsa, haq boʻlsa, chiqsin, oʻzini koʻrsatsin, nima uchun, qanday maqsadda bunday ahmoqona seriallar berayotganini tushuntirsin!
Balki, men notoʻgʻri ifodalagandirman, balki boshqa sababi bordir. Xullas, ayrim insonlar seriallar haqidagi postimni "Televideniyeda ishlash harom ekan?" deb tushunishyapti. Yoʻq, azizlar, men unday demadim. OʻzMTRKda ishlash harom deb aytmadim. Balki millatimiz shaʼnini bulgʻayotgan, yoshlar odobini buzayotgan, juda koʻp zarari tegayotgan fahsh aralash seriallarni efirga uzatish, uni tayyorlashda qatnashish joiz emasligi haqida gapirdim", deb yozgan u. BBCUZBEK.COM Facebook va ok.ru dagi sahifalardagi oʻquvchilari orqali ushbu ayblovlarga munosabat bildirishni soʻradi.
"Ziyovuddin Rahim domlaning gapiga karshi chikish uchun uningdek bilim egasi boʻlish kerak. Komment yozganlarning koʻpchiligi ilmdan bexabar insonlar.Shu kishidek ulamolarimiz bizga tugri yul koʻrsatsa darrov notoʻgʻri talqin qilish boshlanadi. Bunday seriallar toʻxtatilishi kerak. Hak gapni aytganlar", deydi Rano Goziboyeva.
"Turkiyada bunday seriallar berib boriladi. Turkiya demokratik davlat. Bu kabi seriallar berib borilishi tabiiy xol. Shu bilan birga diniy kanallar, amru maʼruf kanallari xam bisyor. Turkiyada bu kabi seriallarni koʻrishdan musulmonlarni qaytarish uchun bemalol ilm axllari oʻzlarining qarshi fikrlarini bildirishadi. Xattoki ilm axllari va oddiy musulmon qatlam yegʻilishib, bu kabi serial xamda koʻrsatuvlarni yoyindan qoldirilishini soʻrab imzo toʻplashadi. Bu ishlar natijasida shu kabi axloqqa zid boʻlgan koʻrsatuvlarni efirdan olib tashlanishiga xam erishishgan. Bu kabi qarshi fikr bildirganlarga xech qanday jinoiy ish ochilmaydi. Turkiya demokratik davlat, xar kim oʻz fikrini aytish xuquqiga ega. Oʻzbekiston xam demokratik davlat emasmi?", deydi Xon Buvi.
Abdu Salim nomli foydalanuvchi matn muallifidan Oʻzbekiston qonunlarini hurmat qilishni soʻraydi.
"Matn muallifi iltimos davlatimiz konunlariga hurmat bilan qarang. Hech kimni xoin va munofik deb asossiz va konunsiz aytilishiga ruxsat yoʻq. Davlatimiz qonunlarida bu serial mumkin, bu mumkin emas degani yoʻq. Faqat pornografiya va ekstremizmni targʻib qiluvchi boʻlsa mumkin emas, buni xam tegishli idora qarori bilan amalga oshiriladi. Davlatimiz dunyoviy davlat, diniy emas. Diniy normalar majburiy xarakterga ega emas. Boshqalarning xohishlarini hurmat qiling", deydi u.
Anvar Kodirov dublyajda ishtirok etgan aktyorlar faqat kinoga ovoz berganini va kinoni tanlash huquqi yoʻqligini aytadi. Unga koʻra luarni nishonga olinishi toʻgʻri emas. Fikrlarni esa tamgʻa ishlatmasdan ifoda etish mumkinligini aytgan.
Facebook da ancha faol boʻlgan blogger Musannif Adham boshqalarning erkinligiga daxl qilmasdan erkinlikni talab qilish kerakligini yozgan.
"Men bir narsaga qatʼiy ishonaman: mening eʼtiqodim - Islom aqidasi dunyodagi eng kuchli aqida. Shunday ekan, men uni kuch bilan targʻib qilishimga mutlaqo hojat yoʻq. Aksincha, uni yetkazib, tushuntirib bera olsam, kifoya - xalqning hammasi boʻlmasa ham katta qismi unga ergashadi. Menga Islomni tushuntirishga, uni xalqqa yetkazishga imkon kerak. Shuning uchun qayerdagi seriallar, kontsertlarning zararidan, tarqalishidan xavfsiramayman, ularga taqiq qoʻyilishini talab qilmayman. Shunchaki, ularga berilgan imkon menga ham berilishini istayman. Qolganini vaqt oʻtib koʻramiz, Insha Alloh", deb yozgan Musannif Adham oʻz sahifasida. BBCUZBEK.COM bilan Telegram orqali +44 7858860002 nomeri bilan bogʻlaning. Telegram kanalimiz: https://t.me/bbcuzbek
Nima uchun Islomga osilganlaring osilgan.
Buni qo'zg'ashdan kimga naf bo'lyapti!
Maqola xech qanday ekstramestik ruhga yoki taxdidga ega emas!
U ( Alloh ) kimning yuragida nima borligini biladi.
Qur'on 67:13