Oʻzbekiston yoʻllarining sifatiga necha ball berasiz?

https://www.bbc.com/uzbek/central-asia-44356160 Jahon Iqtisodiy Forumi(World Economic Forum) jahondagi 137 mamlakat yoʻllariga baho bergan.

Bu reytingda Oʻzbekistonning yoʻqligi mamlakat yoʻllarining sifati dunyoning 137 mamlakatinikidan ham yomon degan maʼnoni anglatadimi?
Jahon Iqtisodiy Forumi u yoki bu mamlakatdagi yoʻl sifatini 1 dan 7 ballgacha shkalada baholagan.
Qaysi mamlakat yuqori ball toʻplagan boʻlsa, yoʻllarining sifati yuqori.
Jami toʻplagan balli past boʻlgan mamlakatning yoʻllari sifatsiz degan xulosani beradi.
Eng yuqori 7 ballni 137 mamlakat orasidan birortasi ham toʻplolmagan.
1-oʻrinda Birlashgan Arab Amirliklari 6,4 ball, Singapur 6,3 ball bilan ikkinchi, Shveytsariya 6,3 ball bilan uchinchi oʻrinni egallagan.
Jahon Iqtisodiy Forumi reytingida sobiq SSSR mamlakatlari orasida eng yuqori oʻrinni Ozarbayjon egallagan.
Ozarbayjon yoʻllari 4,8 ball bilan 36-oʻrinda.
Ozarbayjon ortidan 4,7 ball bilan 37-oʻrinni Litva, yana 4,7 ball bilan 38-oʻrinni Estoniya egallagan.
Markaziy Osiyo mamlakatlari orasida eng yuqori oʻrinda Tojikiston joylashgan.
4,1 ball bilan Tojikiston 70-oʻrinda.
Gruziya 82-, Armaniston 85-, Latviya 107-, Rossiya 114-, Qozogʻiston 115-, Qirgʻiziston 122-, Moldova 128-, Ukraina 130-oʻringa qoʻyilgan.
Bu roʻyxatda Oʻzbekiston, Belarus va Turkmaniston yoʻllariga baho berilmagan.
Aksar kuzatuvchilar fikricha, Tojikistonda yoʻllar xususiylashtirilgani magistral yoʻllar sifati yaxshilanishiga olib kelgan.
Tojikistonning yoʻllari Oʻzbekistonnikiga nisbatan tekis ekanini yaqinda chegaralar ochilib, Tojikistonda mehmonda boʻlib qaytgan oʻzbekistonlik jurnalistlar ham eʼtirof etdilar.
Oʻzbekistonda nega juda tekis, uzoq vaqtga chidaydigan sifatli yoʻl qurilmaydi?
Buning asosiy sababi sifatida korruptsiya tilga olinadi.
Hali SSSR zamonidayoq "20 santimetrli asfalt qatlami yotqizish kerak boʻlgan joyda bir santimetr kam yotqizish" bilan necha-necha tonna bitum, shagʻal va million-million soʻmni "choʻntakka urish mumkin"ligi kalkulyatsiyasi yurardi.
Keyinchalik Kamchiq dovoni yoʻlini shishadek tekis qilib bermoqchi boʻlgan xorij shirkatiga Oʻzbekiston rahbariyatidagi masʼul shaxslar tomonidan rad javob berilgani haqidagi latifa ham tarqalgan.
Oʻzbekiston yozi va qishiga mos standart boʻyicha asfalьt yotqizilmasligi yoʻllarning tez oʻydim-chuqur boʻlib qolishiga olib keladi.
Mamlakatda soʻnggi yillarda yoʻlchi kasbi sifati ham tushib ketdi: "ura-ura", "mustaqillik bayramigacha" qurib bitkazilishi sharti bilan qurilgan koʻcha va yoʻllar chetida lotok yoki suv chiqargichlarni qoʻyish "yoddan koʻtarilib qoldi", oqibatda Toshkent koʻchalari bahorgi yogʻin-sochin kunlarida "basseynga" aylanadigan boʻlib qoldi.
Siz Oʻzbekiston yoʻllarining bugungi sifatiga necha ball berasiz?
Nima deb oʻylaysiz, Oʻzbekiston World Economic Forumning yoʻllari sifati baland mamlakatlari roʻyxatiga qachon kiroladi? BBCUZBEK.COM bilan Telegram orqali +44 7858860002 nomeri bilan bogʻlaning. Telegram kanalimiz: https://t.me/bbcuzbek https://www.bbc.com/uzbek/central-asia-44356160 #ўзбекистон #тожикистон #таджикистан #йўл #кўча #OZbekiston #tajikistan