Што такое шчасце?

Запытала цётка Насця:
- Дзеткі, што такое шчасце?
- Шчасце, - прастагнаў Якуб, -
Як не баліць мой кутні зуб.
За Якубам кажа Тома:
- Шчасце, калі мама дома.
Наша мама сцюардэса:
Лондан, Кіпр, Парыж, Адэса...
Увесь час яна ў палётах
На магутных самалётах.
- Не, уступіла ў спрэчку Юля, -
Маё шчасцейка - бабуля.
Безліч казак яна знае
І заўсёды мне іх бае.
Ды прыносіць падарункі
На ўсе святы круглы год.
Як спячэ пірог ці булкі -
Самі скачуць яны ў рот.
- Не, - пачырванела Света, -
Маё шчасце - гэта лета:
Тут суніцы і чарніцы,
Тут маліна і каліна,
Многа весялосці, смеху,
Многа лузанцоў-арэхаў.
А яшчэ, - падтакнуў Жора, -
У турнэ з сям'ёй на мора!
Каця кажа:
- Эй, Мацвей,
Ты ж у нас грамацей!
Падкажы, - смяецца Каця, -
Які колер мае шчасце?
Той хіхікнуў у адказ:
- Жартам я пацешу вас.
Цвету пэўнага не мае,
Бо яно шматколернае.
- І яшчэ, - рагоча Рая, -
Каго хоча выбірае.
- Шчасце, - перабіла Лара, -
Гэта - здзейсненая мара.
Колькі тут ні гавары,
Як вы лічаце, сябры,
Зразумела цётка Насця,
Што гэта такое - шчасце?
Уладзімір Мацвеенка