З Вясной, сябры) Дачакаліся!

Пачну з самаіроніі: учора завітала на Фестываль дзіцячага чытання ў Музей Якуба Коласа. Калі набывала ўваходны квіток, касір, паглядзеўшы на мяне сказала: "Вам, мабыць, нецікава будзе, Фестываль жа дзіцячы..." Я усміхнулася, а пра сябе падумала (але не агучыла): старому, як і малому патрэбны штодня новыя ўражанні і "Новы дзень - свежы агонь пачуццяў" (цытую У.Ліпскага).
Таму адказваю - мне было цікава! Праўда, я прысутнічала толькі на двух выступленнях - з задавальненнем паслухала Марыю Міхайлаўну Міцкевіч, унучку Я.Коласа, якая знаёміла прысутных дзяцей з жыццёвым і творчым шляхам Песняра, а потым зладзіла віктарыну, падчас якой дзеці вельмі актыўна адказвалі на пытанні і атрымоўвалі памятныя сувеніры. А другая сустрэча - заўсёды у радасць для мяне асабіста. Да дзяцей на Фестываль завітала абаяльная беларуская пісьменніца Кацярына Хадасевіч-Лісавая. Дзеці любяць і ведаюць герояў Кацярыны Станіславаўны, а яна ўмее зрабіць сустрэчу не сумнай, гадзіна праляцела як адзін міг.
А яшчэ атрымала падарункі ад супрацоўнікаў "Выдавецкага дома Звязда", якія атрымаюць вучні бліжэйшых школ, з якімі я палюбіла сустракацца) Удзячна ўсім!