Пра стварэнне Інвестыцыйнага фонду рэканструкцыі паміж Амерыкай і Украінай заявіла міністэрства фінансаў ЗША.

У заяве гаворыцца, што гэтае партнёрства дазволіць дзвюм краінам паскорыць эканамічнае аднаўленне Украіны.
Міністр фінансаў Скот Бесэнт адзначыў, што пагадненне ясна дэманструе Расіі цвёрды намер адміністрацыі Трампа на мірны працэс, заснаваны на прынцыпах свабоднай, суверэннай і квітнеючай Украіны ў доўгатэрміновай перспектыве. Ён таксама дадаў, што любыя дзяржавы або асобы, якія падтрымлівалі расійскі ВПК, не атрымаюць выгады ад працэсу аднаўлення Украіны.
На падпісанне дакумента ў Вашынгтон прыляцела віцэ-прэм'ер Украіны Юлія Свірыдзенка. На сваіх старонках у сацсетках яна напісала, што па ўмовах пагаднення «поўнае права ўласнасці і кантроль» застаюцца за Украінай. Кіраванне фондам будзе ажыццяўляцца сумесна з ЗША, і ні адзін з бакоў не атрымае права вырашальнага голасу. Фонд будуць папаўняць за кошт даходаў ад новых ліцэнзій на здабычу рэсурсаў, якія плануюць пароўну размяркоўваць паміж краінамі.
Нагадаем, у лютым Уладзімір Зяленскі прылятаў у Вашынгтон, каб заключыць здзелку аб рэдказямельных металах, але тады сустрэча скончылася сваркай, і пагадненне не падпісалі.
Крыніца: https://home.treasury.gov/news/press-releases/sb0126