Па даных сервіса Companies Market Cap, рынкавая капіталізацыя кітайскай кампаніі Pop Mart, якая выпускае дзіка папулярныя цацкі, дасягнула 41,52 мільярда долараў.

Расійскі «Газпром» цяпер жа ацэньваецца ўсяго ў 38,28 мільярда долараў.
Кіраўніцтва Pop Mart заявіла, што за апошнія паўгода выручка ад продажу яе тавараў павялічылася больш чым утрая. Чакаецца, што рост прыбытку кампаніі за першае паўгоддзе 2025 года складзе мінімум 350%.
Галоўны тавар кампаніі – цацкі Лабубу, якія ўпершыню з'явіліся на рынку ў 2019 годзе. Але толькі сёлета яны набылі па-сапраўднаму вірусную папулярнасць як на азіяцкім, так і на еўрапейскім рынку. Монстрыкаў скупаюць і дзеці, і падлеткі, і дарослыя – ад стыльных модніц да сур'ёзных калекцыянераў.
Поспех Лабубу звязваюць з продажам цацак у «сляпых скрынках», якія не даюць даведацца, як яна выглядае да распакоўкі. Росту папулярнасці кітайскага брэнда паспрыялі таксама і партнёрскія пагадненні з Coca-Cola і манга-франшызай One Piece.
Крыніца: https://www.bbc.com/news/articles/cvg85e0v5vyo