12 кастрычніка 2023 г.

у Авальнай зале Новага замка адбылося адкрыццё выстаўкі “Амто (здравствуй), Корякия!” з прыватнай калекцыі Людмілы Каюравай. Выстаўка праходзіць пры падтрымцы Міністэрства культуры Камчацкага края Расійскай Федэрацыі.
На выстаўцы госці і жыхары горада змогуць пазнаёміцца з яркай, самабытнай і ўнікальнай матэрыяльнай культурай карэнных малалікіх народаў Поўначы, якія жывуць на тэрыторыі Камчацкага края: каракаў, чукчаў, ітэльменаў, эвенаў і іншых.
Наведвальнікам дэманструюцца традыцыйная вопратка, абутак і паясы паўночных народаў. Сярод экспанатаў – сапраўдныя рарытэты: каракскі краільны нож, калекцыя унікальных жаночых сумачак для рукадзелля з лапак дзікіх гусей, качак, мужчынскія каракскія і эвенскія кісеты і табакерка, старажытны касцяны грэбень для расчэсвання травы, рытуальныя скураныя акуляры, радавое кап’ё і шмат іншых прадметаў паўночнага быту.
Наведвальнікі пазнаёмяцца з дзівоснай прыродай Камчацкага паўвострава, з жыццём карэнных паўночных народаў, асаблівасцямі іх качавога і аседлага ладу жыцця, аленегадоўляй, вераваннямі і звычаямі.
Уладальнік калекцыі Людміла Віктараўна Каюрава збірае творы мастацтва і дэкаратыўна-прыкладнога мастацтва з 1980-х гг. Праект Л.В. Каюравай «Амто (здравтсвуй), Корякия!» у 2011 г. адзначаны спецыяльным дыпломам IV Маскоўскага Міжнароднага фестывалю дэкаратыўнага мастацтва «Знакі Роднай Зямлі».