Жыхар Турава завёў сабе незвычайнага гадаванца – грака!

Паглядзіце, у якіх умовах жыве птушка
Грак трапіў у сям’ю Мікалая Наскова выпадкова два гады таму. Аднойчы мужчына заўважыў каля паліклінікі разбуранае гняздо з пяццю птушанятамі. Толькі адзін з іх падаваў прыкметы жыцця. Мікалай яго пашкадаваў і забраў дадому.
Грака назвалі Федзем. Спачатку ён пасяліўся ў загоне для куранятаў, але калі падрос і стаў лётаць, певень аб’явіў яму вайну. «З’язджаць» ад Мікалая птушка не збіралася, таму для яе змайстравалі прасторны вальер з разнастайнымі галінкамі, цацкамі і нават тазікам з вадой.
Мужчына кажа, што Федзя яго пазнае і асаблівым чынам вітае па раніцах. Мікалай нават можа адрозніць у яго карканні сігналы трывогі, радасці ці проста звычайнае «балбатанне».
Клопату з ім амаль няма, а радасці прыносіць шмат. У сям’і незвычайнага гадаванца вельмі любяць. Часта завітваюць да Мікалая і «турысты», аднакласнікі старэйшага сына, каб пабачыць цікавую птушку.
Крыніца: https://www.palesenews.by/2025/04/ptica-schastya-ih-semi/