Гамяльчанка з унукам пайшла ў кіно і здзівілася, што, акрамя іх, больш ніхто не прыйшоў на сеанс

Падпісчыца «Моцных Навін» расказала, што захацела з унукам пайсці ў кіно на фільм «На деревню дедушке».
Па яе словах, на сайце «Гомелькінавідэапракату» было напісана, што продаж квіткоў на сеанс ужо закрыты. Але яна ўсё адно звярнулася ў касу пры кінатэатры і змагла купіць квіткі. А калі гамяльчанка з унукам зайшлі ў залу перад пачаткам сеансу, то вельмі здзівіліся, бо, акрамя іх, больш нікога там не было.
У кінатэатры імя Калініна жанчыне адказалі, што не маюць дачынення да анлайн-афішы і ніяк не могуць на гэта паўплываць.
«Нам квіткі прадалі, але мы былі адзінымі на сеансе – і то толькі таму, што зайшлі ў кінатэатр і пацікавіліся. Але іншыя людзі, убачыўшы, што квіткоў няма, проста не пойдуць, на жаль. А фільм цікавы, тым больш у час летніх канікул», – падзялілася жанчына.
Мы праверылі сайт і сапраўды ўпэўніліся, што менавіта на гэты фільм купіць квіткі анлайн немагчыма. А вось з продажам на іншыя фільмы праблем няма.
Звязацца з тэхпадтрымкай сэрвісу Afisha24 па тэлефоне нам не ўдалося – датэлефанаваліся толькі да аўтаматычнага робата з запісам адказаў на розныя пытанні.