Урад Беларусі распрацаваў законапраект, які ўдакладняе парадак падаткаабкладання даходаў беларусаў ад продажу агародніны, садавіны, ягад і прадуктаў жывёлагадоўлі з асабістых гаспадарак.

У дакуменце прапісаны новыя ўмовы вызвалення ад выплаты падаходнага падатку.
На сёння даходы ад рэалізацыі сельгаспрадукцыі не абкладаюцца падаткам, калі яны не перавышаюць 200 базавых велічынь (8,4 тысячы рублёў) у год і не носяць сістэматычнага характару. У адваротным выпадку грамадзяне абавязаны заплаціць 10% з сумы перавышэння.
А новы законапраект прапануе вызваляць ад падаткаабкладання тых, хто зможа дакументальна пацвердзіць легальнасць паходжання сваіх даходаў.
Для атрымання ільготы спатрэбіцца прадаставіць адзін з пацвярджаючых дакументаў:
🔹 даведку аб вядзенні асабістай падсобнай гаспадаркі;
🔹 дагаворы з нарыхтоўчымі арганізацыямі;
🔹 або дакументы аб прадастаўленні гандлёвага месца на рынку.
У гэтых паперах павінна быць падрабязная інфармацыя пра віды, аб'ёмы, кошт прададзенай прадукцыі, а таксама даты здзяйснення здзелак.
А калі дачнік не зможа падаць такія дакументы, падатковыя органы разлічаць магчымы даход на аснове афіцыйнай статыстыкі сярэдняй ураджайнасці і цэн на сельгаспрадукцыю.
Гэтыя змяненні закрануць толькі тых грамадзян, для якіх такая дзейнасць з’яўляецца дадатковай, а не асноўнай крыніцай даходу.
Крыніца: https://pravo.by/document/?guid=3941&p0=2025032001