У Германіі збіраюцца вытраціць больш за 16 мільёнаў еўра на рамонт… кіёску

Маўрытанскі кіёск з’яўляецца гістарычным помнікам у парку замка Ліндэрхоф. У ліпені яго зачыняць на генеральную рэстаўрацыю ажно на чатыры з паловай гады. Усяго на праект аднаўлення выдаткавана 16,6 мільёна еўра.
Замак Ліндэрхоф, дзе месціцца гэты важны гістарычны аб’ект, раней быў адной з каралеўскіх рэзідэнцый Людвіга II, празванага казачным каралём. У Маўрытанскім кіёску яму падчас адмысловых цырымоній падавалі гарбату, пры гэтым слугі апраналіся ва ўсходнія гарнітуры і палілі кальян.
Кіёск вырабілі ў якасці экспаната для Сусветнай выставы ў Парыжы 1867 года. Гэта адна з найстарэйшых выставачных канструкцый у свеце. Ён складаецца з 2 тысяч асобных філігранных частак і элементаў, вырабленых з жалеза, цынку і шкла.
Праект дэманстраваў тады магчымасці сучасных будаўнічых матэрыялаў і тэхналогій. Затым ён захоўваўся ў разабраным выглядзе на складзе, пасля чаго ў 1876 годзе яго набыў Людвіг II для Ліндэрхофа.
Крыніца: https://radio-oberland.de/news/2025-07-09-maurischer-kiosk