У Віцебску знайшлі новы від птушак для Беларусі.

На жаль, асобіна загінула
21 кастрычніка жыхарка Віцебску Паліна Дубавая звярнула ўвагу на птушку, якая разбілася аб шкляны будынак гандлёвага цэнтра.
Аказалася, што гэта самка белаваллёвага дразда (Turdus torquatus). Гэты від раней не фіксаваўся ў нашай краіне. Сярод арнітолагаў існавала гіпотэза, што такія птушкі мігруюць праз Беларусь. Звычайна белаваллёвыя дразды гняздуюцца ў горных раёнах Скандынавіі, а на зімоўку пералятаюць на поўдзень праз нашую краіну.
Учорашняя знаходка пацвярджае гэтую думку. Такім чынам беларускі спіс птушак папоўніцца 344 відам.
Што да пытання смерці птушкі – на жаль, аб шыбы толькі ў Беларусі падчас міграцыі забіваюцца сотні тысяч птушак штогод. Сярод іх бываюць і рэдкія, і новыя для краіны віды.
Калі ёсць магчымасць – варта засцерагчы іх ад гібелі, а яшчэ – прыглядацца да мёртвых асобін, асабліва калі яны выглядаюць незвычайна, або маюць кольцы. Гэта каштоўная інфармацыя для навукі.
Крыніца: https://t.me/wildlifebelarus/4245 Фота: Паліна Дубавая