ПУРНАТАНО ЛЕДСТНЕМАТ #СерафимаЛюлякина100иеть

Вечкевикс ялгат - С.М.Люлякинань шкинеманзо (творчестванзо) вечкицят! Минь пурнатано Серафима Марковнадо ледстнемат. Кучодо тенек эсенк ёвтнеманк сказительницадонть. Минь мельспаросо невтьсынек сынст весенень. Истя минь васттано Люлякинанень 100 иень топодеманть.
Вана тенк сёрмадовкс Маризь Кемалень пельде. Сон сёрмадозель "ЧИЛИСЕМА" эйкакшонь туртов журналс 2007 иестэ.
МАРКОВНА
С.М. Люлякина чачома чистэнзэ 85 иетненень
«Марковна», «Сима патяй», «Серафима Марковна» – истя пшкалесть сонензэ эрямстонзо. «Левкскем», «цёринем», «золотойнем», "сырнень покольнем" – истя ламонень мериль сон. Лиянь ёнов а молиця, килангов шождасто кепедевиця те авась ютась зняро эрзянь велеть,
морсесь зняро школасо, клубсо, маряви, а содыцянзояк арасельть. Сонзэ вечкилизь сыретнеяк, одтнэяк, вишкинетнеяк: куш зяро иесэ кунсолыцянтень маштыль муеме седейс ки, маштыль талновтомо, маштыль кецявтомояк. Весемеде покш бажамозо ульнесь — морамс эсензэ ладсевть моротнень ды каземс тень вельде ломантненень
С.М. Люлякина чачсь 1922 иень медьговонь 29-це чистэ Самара ёнксонь
Похвистневбуень Ягодной велесэ. Шкатне стакальть, тонавтнемс савсь а кувать: прядсь ансяк ушодомань школа. Важодсь колхозсо, мирденень лисемадо мейле трясь-кастась сисем эйкакшт. Ды пингензэ перть морась. Сонзэ мазый, гайтев вайгелесь свал ульнесь моронь ветицякс. А стяко мейле важодемеяк аравтокшнызь велень клубс. Ушодсь моронь сёрмадомо ды музыкас ладсемест. Ёроков аванть редизь, кармасть тердтнемензэ морамо радиосо, телевидениясо, стихензэ кармасть печатамо
Седеяк парсте шкинемань тевензэ тусть Саранов самодо мейле. 1982-це иестэ лиссь «Моронь гайть» васенце пусмозо, теде мейле мельга-мельцек нолдазельть «Расскажу тебе» (1986), «Минек оянок» (1988), «Тонеть, Мордовиям, моран» (1990), «Кодамо вараканть видечизэ» (1991), «Сказки, стихи, басни» (1993). Тесэ Марковна совавтозель Россиянь Сёрмадеень вейсэндявксос, 1990-це иестэ максозель тензэ
Мордовиянь культурань заслуженной роботникень лемесь, 1992-це иестэ МССР-нь Госпремиясь ды Комсомолонь премиясь, Республикань сёрмадейтнень марто яксесь Московов, Эстэнь ды Суоминь Масторов, Чехословакияв…
Мон парсте содылия Серафима Марковнань, ламоксть лететсь вейсэ яксемс ловныця марто вастоматнес. Оймезэнь свалшкань ледстнемакс кадовсть Пенза, Самара, Оренбург ёнксонь, Чуваж Масторонь ды эсенек республикань эрзянь велетнева якамонок ды се а кекшевиця кенярксось, кона валдомтыль ломантнень чамаст. Арась, Марковна эзь ловно лекцият, эзь корта трибунасто сыргозтиця валт. Тень теинек минь, «тонавтозь» ломантне. Сон ансяк морась. Но морамозо витилизе куш кодамо лажаня,
мелень мольстиця вастоманть. Паряк, секс сонзэ мельспаросо сайнесть мартост экспедицияв институтонь-университетэнь тонавтыцятнеяк.
Монь свал абунгавтыль, кода сон вечкиль ды бажиль ломань марто неть вастоматнес.
Сестэ уш а одоль, кодгементнень трокс тензэ ульнесть, ды зярдояк эзь учне куватень энялдомат-сюконямот: ансяк пшкадить тензэ, вант, каподьсы эрзянь оршамо марто вишка чемоданнэнзэ — ды анок сыргамо. Мон весть натой меринь тензэ: «Чей, сизекшнат, Марковна, неть ардтнематнеде!» «Сизекшнан, — келя, — левкскем, а сёпса. Ансяк морамось – эрямосом весемеде покш мельспаром, секс морамо карман куломозом». Ды видеяк, морась пичксема кудос понгомазонзо, косто мекев стака ормась эзизе нолда: 1993 иень якшамговсто Серафима Марковна тусь юткстонок. Калмазь тиринь велензэ
Маризь Кемаль
Фотосонть: Марковна (вить ёно)
ды Маризь Кемаль 1990 иень кизна
Похвистневасо улемстэ