ЁРКИН БАСИР ШЕЪРЛАРИДАН

СЕНСИЗЛИККА КЎНИКДИМ, КЎНДИМ..
Сенсизликка кўникдим, кўндим,
Сенсизликка ўрганиб қолдим!
Лек соғиниб бугун тонг саҳар,
Сени яна ёдимга олдим.
Ёдимдасан ҳар кун, ҳамма вақт,
Ёдга олдим ҳар бир сўзимни.
Ёпиб кетсанг бўлмасмиди, айт,
Очиқ қолиб кетган кўзимни.
Умидимни уздим, узулди
Узилмасдан қолган ришталар.
Сени ўйлаб кўнглим бузулди,
Юрагимни бузди нишдалар.
Сен менсиз ҳам яшай оласан,
Сен менсиз ҳам бахтиёрсан, шод.
Наҳот сен деб, наҳот сен учун,
Қилган эдим дунёмни барбод?.
Лекин сени яна эсладим,
Эслаб қўйди сени кўз ёш ҳам.
Унутмайман сени ҳеч қачон,
Унутмасин сени қуёш ҳам.
Сенсизликка кўникдим, кўндим,
Лекин сени ёдимга олдим.
Мен уйғониб бугун тонг саҳар,
Сени яна соғиниб қолдим!
СЕНСИЗЛИККА КЎНИКДИМ, КЎНДИМ,
СЕНСИЗЛИККА ЎРГАНИБ ҚОЛДИМ.