🏫Борды мәктәбенең 1нче һәм 3нче класслары укытучысы, авыл балалар бакчасы җитәкчесе Альбина Тимофеева яңа уку елы башланыр алдыннан гына хәрби операциядәгеләр янына барып кайтты.

Бу – Альбинаның Украинадагы махсус хәрби операциядә хезмәт итүче ире Михаил янына алтынчы баруы❤️
Бордылыларның штурм ротасындагы хәрбиләргә кыр шартлары өчен әзерләгән кирәк-яракны җиңел машинасына төяп, 21 августта җаваплы сәфәргә кузгалды Альбина Тимофеева. 2 мең чакрымнан артык араны рульдә узып, махсус зонадагы ире һәм аның хезмәттәшләренә, якташларга сугыш шартлары өчен кирәк-ярак илтеп тапшырды. Ул олы юлдан атна көнне кайтты.
Хәерле һәм имин юллар теләп озаткан әти-әнисе, балалары Элиза белән Ярослав кына түгел, без дә юлга ялгыз чыгучы Альбина өчен борчылып торган идек. Җаваплы сәфәрдән әйләнеп кайтуга, хәл-әхвәлен белештек.
“Алгы сызык”та хезмәт итүче ире Михаил, алдан билгеләнгән урынга иптәшләре белән чыгып, Альбинаның машинасындагы йөкне тиз генә үз машиналарына төягәннәр. Олы юлда тукталган булсалар да, озаклап сөйләшеп тору җае булмаган. Гуманитар йөк өчен рәхмәт әйтеп, хәрбиләр тиз генә китеп барганнар. Аларның Борды халкына, гуманитар йөкне әзерләшкән һәркемгә рәхмәтен Альбина Тимофеева “Туганайлар” газетасы аша да җиктерүебезне сорады. Вәгъдәне үтибез – Украинадагы махсус хәрби операциядәге ир-егетләргә ярдәмегез өчен, барыгызга да фронттагы Михаилның һәм аның сугышчан иптәшләрнең рәхмәтен тапшырабыз.
– Фронтта аларга иң кирәге – маскировка челтәре, антидроннар, ашамлык, “влажный” салфеткалар... Ике антидрон җайланмасы да алып барган идем. Аларның берсе-берсе 88 меңлек. Антидронның берсен үзебезнең Тукай муниципаль районы администрациясе бирде. Икенчесен Борды халкы белән җыелышып алдык. Мишаның СВОда бергә булган, хәзер Чита шәһәрендә яшәүче дусты да акча күчерде. Ул акчаны да антидрон алырга тоттык, – дип сөйләде Альбина Тимофеева. – Токмач, тозлы кыяр һәм гөмбә, бал, печенье алып барган идем. Бәтке авылының “Своих не бросаем” төркеме волонтётрлары күп итеп тәмле чәй һәм 4 маскировка челтәре биреп җибәрделәр. Яңа уку елы башлана, тиз генә барып булмас. Бәлки, дөньялар тынычланып, үзләре тиздән кайтырлар. Андагы егетләрнең дә, безнең дә теләк бер – сугыш тукталсын да, Ватан кушкан бурычны намус белән үтәүче якыннарыбыз өйгә исән-сау кайтсыннар. Үзебез дә, балалар да ул көн җиткәнен көтәбез.
Альбинага кушылып, “Туганайлар”ны укучылар һәм барлык карендәшләр исеменнән, махсус операциядәге ир-егетләргә иминлек телибез. “Без үз илебезне саклыйбыз”, – дип әйтүче Михаилга, аның белән бер сафтагыларга һәм, гомумән, еракта Ватан кушкан бурычны үтәүче барлык ир-егетләргә җиңү юлдаш булсын🙏