Америкалик актёр Робин

Уильямс Тиберон (Калифорния
штати)даги уйида ўлик ҳолда
топилди, дея хабар бермоқда
Reuters ахборот агентлиги.
Полиция вакилларининг
сўзларига кўра, «Оскар»
мукофотининг 63 ёшли соҳиби
ўз жонига қасд қилган.
Фожеа 11 август, душанба куни
маҳаллий вақт билан соат
тахминан 11:20 (Тошкент
вақти билан 23:20) атрофида
содир бўлган, деб ёзади Los
Angeles Times. Марин округи
шерифининг маълум
қилишича, Уильямс ўлимининг
дастлабки тахминий сабаби
асфиксия (бўғилиш) бўлиши
мумкин.
Шерифнинг қўшимча
қилишича, полиция ўлимнинг
асосий версияси сифатида ўз
жонига қасд қилишни кўриб
чиқмоқда, бироқ актёр
ўлимининг аниқ сабаблари 12
август, сешанба куни бўладиган
суд-тиббий экспертизасидан
сўнг маълум бўлади.
«Бугун тонгда Робин Уильямс
ҳаётдан кўз юмди. Сўнгги
вақтларда у оғир тушкунликка
қарши курашаётган эди. Бу биз
учун жуда кутилмаган йўқотиш.
Актёрнинг қариндошлари ва
яқинлари ушбу осон бўлмаган
даврда уларнинг шахсий
ҳаётига ҳурмат бажо
келтиришни сўрашмоқда», –
дея ABC News телеканали актёр
вакили Мару Буксбаумдан
иқтибос келтирмоқда.
Робин Уильямс актёрлик
фаолияти давомида «Оскар»
мукофотини қўлга киритган,
шунингдек, беш марта «Олтин
глобус» лауреати бўлган. Барри
Левинсоннинг «Хайрли тонг,
Вьетнам» фильми Уильямсга
машҳурлик келтирган.
Шунингдек, у «Миссис
Даутфайр», «Август Раш», «Икки
ёшли одам», «Орзулар қаерга
олиб боради», «Табиб Адамс»,
«Жуманжи» ва бошқа қатор
фильмларда суратга тушган.
Энг нуфузли киномукофотга
актёр «Зукко Уилл Хантинг»
фильмидаги иккинчи даражали
роль учун қўлга киритган эди.
Уильямс фаолияти давомида
300га яқин фильмларда суратга
тушган.
Manba: Kun.uz