ЭМИ СИЗДЕН ҮЙРӨНӨМҮН СҮЙГӨНДҮ

Аскадагы алмаз таштай чагылып,
Бул махабат кайдан келди агылып?
Демин басам алданбоого сезимдин,
А жүрөгүм, башын ийбейт, чамынып.
Чагылгандын учкунундай жалгыз от,
Көзөп өттү калканчасын жүрөктүн.
Таамай атып жаа-жебесин көтөргөн,
Бул мергенчи табышмагы чүрөктүн.
Эки бетим албаргандан кызарат,
Тил күрмөлбөй, чайналат да уялат.
Табы күчтүү махабатка бет келүү,
Кандай кыйын? Ким беттешип туралат?
Бороон-туман ээлеп аруу дүйнөмдү,
Этек-жеңин делбектетти күрмөмдү.
Тээ абалтадан байкабасам сүйүүнү,
Эми сизден үйрөнөмүн сүйгөндү!
Кундузбү Маматова
Куку
27.03.2024.
#көйгөйдөнбиразалаксуу#