#премьера .

Мен эмас, бу кўнгил ақлдан озган,
Ҳаёли шамолда ҳас каби тўзган,
Кўзим сиёҳдону, киприкда ёзган,
Сизга жўнатмаган мактубларим бор!
.
Бир сатри сокину, бир сатри бўрон,
Бири заминдек хор, бириси осмон.
Энг оғир гуноҳнинг ҳукмидан ёмон,
Сизга жўнатмаган мактубларим бор!
.
Айтолмай, бўғзимда қолган каломлар,
Гоҳо алвидолар, гоҳо саломлар,
Гўё сузилмайин қолган таомлар,
Сизга жўнатмаган мактубларим бор!
.
Жазиллаб жонимга босилган чўғдек,
Ўқдонда сақланган охирги ўқдек,
Йўллашга гўёки манзили йўқдек,
Сизга жўнатмаган мактубларим бор!
.
Турарлар сирларим сотмоқчи бўлиб,
Гулханга отмоққа бормайди қўлим,
Раво кўролмайман уларга ўлим,
Сизга жўнатмаган мактубларим бор!
.
Биров кўрмасин деб жонимда тутган,
Минг қайта ўқилиб титилиб кетган,
Бири ҳом, бириси сўнгига етган,
Сизга жўнатмаган мактубларим бор!
.
Малика Тавфиқ