ПЛЮСЫ І МІНУСЫ НОВЫХ ТЭХНАЛОГІЙ

У апошні час шырокай дыскусійнай пляцоўкай, якая прадастаўляе моладзі Беларусі магчымасці ўздымаць самыя вострыя праблемы і задаваць хвалюючыя пытанні прадстаўнікам улады, прадпрымальнікам, грамадскім дзеячам, стаў праект Беларускага рэспубліканскага саюза моладзі “Адкрыты дыялог”. Праект набірае маштаб грамадскага руху, яго акцыі праходзяць ва ўсіх рэгіёнах краіны. Адкрыты дыялог дапамагае сканцэнтраваць увагу моладзі розных узроставых і сацыяльных груп на актуальных пытаннях грамадска-палітычнага жыцця, накіроўваць яе на пазітыўнае і канструктыўнае мысленне, жаданне і імкненне зрабіць правільны выбар.
Чарговай тэмай дыялогу, які 20 студзеня прайшоў у Палацы культуры, стала “Уздзеянне сучасных інавацыйных тэхналогій на духоўна-маральнае выхаванне моладзі”. У якасці экспертаў на гэты раз былі старшыня раённага Савета дэпутатаў Ігар Пятровіч, намеснік старшыні райвыканкама Ала Зінавенка, першы сакратар Мінскага абласнога камітэта ГА “БРСМ” Дзмітрый Варанюк, начальнік упраўлення па працы, занятасці і сацыяльнай абароне райвыканкама, старшыня РА ГА “Беларускі саюз жанчын” Надзея Цупа, чэмпіёнка свету і Еўропы па танцах на калясках, майстар спорту міжнароднага класа Ганна Гарчакова, старшыня РА ГА “Беларускае таварыства інвалідаў” Анатолій Якуценка, айцец Грыгорый, урач-псіхатэрапеўт ЦРБ Аліна Ляшчук, вучань 10 класа Уздзенскай СШ №1 імя А. Пушкіна, пераможца абласнога этапа рэспубліканскага конкурсу “100 ідэй для Беларусі” Арцём Новікаў, пастаянны ўдзельнік гарадскіх, раённых і міжрэгіянальных конкурсаў і праграм, наведвальнік аддзялення дзённага прабывання для інвалідаў Аляксандр Абражэвіч. Прафесійна вяла дыялог з гасцямі вядучая Наталля Шатрун.
Размова атрымалася сур’ёзнай і карыснай. Маладыя людзі стараліся выслухаць думку старэйшага пакалення і выказаць сваю, разгледзець пытанне з розных бакоў. А тон задаў першы сакратар абкама БРСМ:
— Не хацелася б, каб наша сустрэча стала чарговай палітінфармацыяй. Больш хацелася б пачуць жывой дыскусіі. Залежнасць ад сацыяльных сетак сёння вялікая. Як правільна навучыцца ўзаемадзейнічаць з новымі тэхналогіямі, каб не нанесці шкоду здароўю, ісці ў нагу з часам? Як засцерагчы сябе ад згубных наступстваў віртуальнага свету?
Адназначна адказаць на гэтыя і падобныя пытанні цяжка, але разам прыйсці да нейкай высновы прасцей, чым разлічваць толькі на сябе. На гэты раз больш адкрыта дзяліліся сваімі думкамі эксперты, а маладыя людзі часцей задавалі пытанні, свае “плюсы” і “мінусы” выказвалі пісьмова.
— Знайсці ісціну ў многіх жыццёвых пытаннях – адна з задач царквы, якая дае арыенціры і ўстаноўкі, — уступіў у размову айцец Грыгорый. — Я, напрыклад, таксама жыву ў грамадстве і карыстаюся новымі тэхналогіямі. Плюсы іх у мабільнасці, пашырэнні кругагляду. Аднак ненармальным становіцца тое, калі чалавек, карыстаючыся імі, адыходзіць ад рэальнага жыцця, “зашываецца” ў гэту віртуальную нішу. Калі ўсё магчыма і даступна, гэта не значыць, што ўсё карысна. Як мудра адзначалі веруючыя людзі, калі чалавек авалодвае многім, нічога не павінна авалодваць ім. Ва ўсім павінен пераважаць здаровы сэнс.
Больш “мінусаў” ад камп’ютараў і мабільных тэлефонаў з пункту гледжання медыцыны назвала яе прадстаўнік А. Ляшчук:
— Па-першае, гэта выпраменьванне. Блізкасць усіх гэтых прадметаў да галаўнога мозгу нежадана. Адыход ад свету рэальнасці на працяглы час таксама не на карысць псіхічнаму здароўю. Адбываецца пераўзбуджэнне нервовай сістэмы ад розных камп’ютарных “стралялак”, “кровапраліццяў” і г. д. Перш чым надоўга “завіснуць у сетцы”, кожны павінен задумацца над сваім здароўем і зрабіць выбар.
Вядома, прасцей даць у рукі дзіцяці мабільны тэлефон і спакойна займацца сваімі справамі. Сучаснай лічыцца і такая бацькоўская пагроза: “Я забяру ў цябе планшэт, калі…”
— Праблема такая існуе, і кожны з нас стараецца з ёй змагацца, — казала Н. Цупа. — Толькі не заўсёды гэта атрымліваецца. Я лічу правілам для сына спачатку рабіць урокі, выконваць нейкія дамашнія абавязкі, а пасля ўжо браць у рукі гаджэт. І абавязкова кантраляваць час.
Пра неабходнасць абмяжоўваць час, праведзены за камп’ютарам, кантраляваць каналы, па якіх дзеці глядзяць мульцікі і ўвогуле знаходзяцца ў віртуальнай прасторы, гаварылі настаўнікі. “Толькі бацькі могуць адрэгуляваць гэту залежнасць свайго дзіцяці”, — такая думка гучала ў зале.
— Мы сталі больш мабільнымі, пастаянна карыстаемся гаджэтамі, “сядзім” на сайтах. Аднак усё ідзе з сям’і. Ні аднаму дзіцяці ніякі камп’ютар ці планшэт не заменіць жывой размовы з мамай і татам, іх пяшчоту, ласкавае слова, добрую параду. Нашым дзецям неабходны жывыя зносіны. І колькі б сяброў не было ў іх у віртуальным свеце, але калі яны, верныя і надзейныя, адсутнічаюць у рэальнасці, гэта ўжо праблема.
Свае “плюсы” і “мінусы” ў рабоце з электроннымі зваротамі грамадзян назваў і старшыня райсавета І. Пятровіч. Думка старшакласніка Арцёма Новіка, які з такім захапленнем расказаў пра свае рэальныя заняткі, — той жа міні-свярлільны станок, які юнак змайстраваў з падручных сродкаў, вела- і кінапаходы з сябрамі, сустрэчы сяброў-аднадумцаў, з якімі пазнаёміўся на конкурсе “ідэй”, — добрае таму пацвярджэнне. Апантанасць у дасягненні мэты вызначае і моцны характар Ганны Гарчаковай, якая 20 гадоў займаецца тан-цамі на калясках. Спачатку танцы былі толькі рэабілітацыяй для магістра педагагічных навук, а пасля — хобі, якое прынесла вядомасць і сілу духу. “Калі бацькі самі штосьці робяць з захапленнем, то ім пад сілу захапіць гэтым і дзяцей: тата – футболам, мама – кулінарыяй. Галоўнае, каб была карысць”, — сведчыла Ганна Віктараўна.
Звяртаючыся да маладых людзей, Анатолій Якуценка прызнаўся:
— Вы шчаслівыя ў тым, што жывеце ў такі цудоўны час, які дае столькі новых магчымасцяў, якіх не мелі мы. Сёння ў моладзі мабільныя крыніцы інфармацыі, навейшыя тэхналогіі, можна толькі парадавацца. Старайцеся толькі карыстацца ўсім гэтым з розумам, давярайце і прыслухоўвайцеся да бацькоў і настаўнікаў, якія жадаюць вам толькі дабра і мудрасці.
Ветэран прызнаўся, што і да гэтай пары захоўвае звычку — па дзве гадзіны ў дзень чытае мастацкую літаратуру. А вось што датычыць камп’ютара, то гэта не яго стыхія. Затое за падапечных аддзялення дзённага прабывання для інвалідаў, якія з лёгкасцю засвойваюць новыя камп’ютарныя праграмы, шчыра радуецца.
Задумацца сёння над тым, што будзе позна паправіць заўтра – галоўная мэта, на якую быў скіраваны адкрыты дыялог. Зразумець, “пракруціць” праз сябе, адкінуць лішняе і асэнсавана выбраць аптымальны для сябе варыянт – вывад, на які былі настроены яго ўдзельнікі, сярод якіх к канцу дыялогу стала ўсё ж больш “плюсаў” у адносінах да новых тэхналогій.
Завяршылася мерапрыемства на прыемнай ноце. Д. Варанюк уручыў падзякі абкама БРСМ актывістам арганізацыі — выкладчыцы ліцэя Аляксандры Серай, настаўніцы гімназіі Вользе Трыгубовіч, Ігару Арэхву з ААТ “Хатляны”, Ксеніі Андросік з РАНСа.
Святлана МІХАЙЛОЎСКАЯ,
Сяргей ШАРАЙ (фота).