#хазил аралаш ҳақиқат

Бир неча дўстларимиз ёзиб қолдирган ёзувларни ўқиб, очиғи, энсам қотди. "Профилимни ўчираман", "Сайтдан чиқиб кетаман! Алвидо!" "Сизлар билан хайрлашиш оғир, аммо кетаман!" Қизиқиб, уларга ёзилган изоҳлар билан ҳам танишдим: "Кетманг!" "Сизсиз қандоқ қиламиз?" "Биз энди қандоқ яшаймиз?" "Сайтимиз сайт бўлмай қолади" ва ҳоказо. Шуям гапми энди? Урушга кетаяпсан-а, барака топгур?! Қайтмас бўлиб кетаяпсан-а?! Аждарҳо билан олишгани кетаяпсан-а? Кетсанг, жимгина чиқиб кетавермайсанми? Энам айтарди: "Кетсанг отамдан нари". Бу сайтга келганимиз воқеа бўлмаганидек, кетганимиз ходиса бўлмайди!!! "Энди нима қиламиз?" деганлардан олти ойдан сўнг сўрайман: "Энди нима қилаяпсиз?" деб. Шу иш давом этаверади, инша Аллоҳ!!! Бобом ўлиб, алмашмаган ишим, энам ўлиб, алмашмаган ишим бир-икки киши "Одноклассники""дан чиқиб кетса алмашармиди? Ажаб!!! Ёш кетаман деб қўрқитармиш, қари ўламан деб! Кетсанг кетавер! Аюҳаннос солишинг нима учун? "Вой, кетманг, сизсиз қандай яшаймиз?" дейишларини эшитиб, бир "семириб" олиш учунми? Ишонманг, сиз сайтдан чиқиш тугул, дунёни тарк этганингизда ҳам "Сизсиз қандай яшаймиз?" деганлар ойдай яшайверадилар! Бизлар дунёдан ўтиб кетсак ҳам ҳаёт давом этаверади, "Одноклассники" қизийверади. Эҳ-ҳе, ҳали сизу биздан бошқа яна неча миллионлаб инсонлар келиб, неча миллионлаб инсонлар чиқиб кетишади бу сайтдан! Жимгина. Биров билан видолашмай! Келганини ҳам биров билмай, кетганини ҳам биров билмай! Хуллас, "Шум бола"даги гап: "Кетганингни биров билмай қолгани яхши, Ҳожи бобо камсуқум одамларни яхши кўрадилар!!!