Мен чин Исломни Индонезияликлардан ўргандим.

2009 йил, Кореяда докторантура қилиб юрибман. Янги фарзандлик бўлганман, қўшимча даромад керак. Бир Индонезиялик Шамсуддин деган биродар "Анвар сен билан битта бизнес қилсак. Кореяда 50000 дан ортиқ Индонезиялик бор. Шуларга смартфон сотсак, мен пул тикаман, сен инглизча прошивка қилиб берсанг. Фойда 50/50" деб таклиф қилди.
Рози бўлдим, иш бошладик. Тижорат яхши бўлаяпти. Орадан бир муддат ўтиб яна бир биродаримиз уйланиб қайтди. Оила боқиш керак, менга келиб силарни бизнесиларга қўшилсам бўладими деб сўради. "Ҳам пулдан, ҳам прошивкадан ёрдам қиламан. Индонезиалик шеригинг билан гаплашиб кўр" деб илтимос қилди.
Шеригим билан учрашдим. Бироз хижолат билан вазиятни тушунтирдим. "Яна бир шерик қўшсак, фойдани 1/3 дан тақсимласак нима дейсан" деб сўрадим.
Ҳалиги биродар:
— "Алҳамдулиллаҳ, жуда зўр бўлади. Демак тижоратимиз янада ривожланар экан. Мижозларимиз янада кўпаяр экан. Аввал иккита оилани боқаётган бизнес энди учта оилани боқади. Улушимиз камаяди, лекин баракаси кўпаяди"-деб жавоб қилди.
Мана шунда мен бизнинг ва уларнинг дунё қараши орасида қанчалик катта фарқ борлигини тушундим. Мана хақиқий тавҳид қандай рўёбга чиқади. Биз хаётга материалистик кўз билан қараб, хақиқий раззоқ Аллоҳ эканлигини унутиб қўйган эканмиз.
Мана шу воқеадан кейин мен мол-дунёга бутунлай бошқа кўз билан қарайдиган бўлдим. Дунёқарашим буткул ўзгарди. Хаётимдаги ҳар бир воқеага ислом кўзи билан қарашга, дин билан қаричлашга ҳаракат қиладиган бўлдим. Айнан шун воқеа ҳам Малайзиядан иш қидиришимга сабаб бўлди.
Кўп жойларга ишга кириш учун ариза топширдим, жавобини кутиб сиқилиб юрсам, Шамсуддин биродар "Сен ўзингни қисмингни қилдинг, қолгани Аллоҳга таваккал. Агар Аллоҳ ризқингни Малайзиядан ёзган бўлса ким ҳам тўғаноқ бўларди"-деб далда берарди.
Алҳамдулиллаҳ вақт ўтиб Малайзиядан жавоб ҳам келди. Кетишга яқин қолганда Шамсуддин биродар нега айнан Малайзия деб қизиқди. Мен "Индонезияликларга ҳавасим келди, Малайзия ҳам шундай бўлса керак"-дедим. Шамсуддин мени секин ёнига тортиб, қулоғимга "Ҳеч кимга айтма, лекин улар биздан ҳам яхшироқ"-деди.
Аллоҳу Акбар.
Мана шундай биродарлар ҳам Аллоҳни неъмати экан.