LOLA

Deyman: sahar shafaqdan
Uchqunmi, lolasanmu,
Shodlik mayiga to’lgan
Gulgun piyolasanmu?
Deydi: qiziq savoling,
Qayda, ajab, xayoling,
Ellar ko’rib bu holing
Kulmoqda, bolasanmu?
— So’zimni qattiq olma,
Boshingni quyi solma,
Buncha qizarma, lola,
Mendan uyolasanmu?
— Sen, ayt-chi, qaysi yog’dan,
Qaysi chaman va bog’dan?
Kulsang dedim, shu tog’dan
Tushgan shalolasanmu?
— Bilsang, uyim shaharda,
Keldim senga saharda,
Yur, xo’p desang agarda,
Yo shunda qolasanmu?
— Ko’ksingda, mayli, inson,
Senga fido qilay jon.
Bargimni she’r yozilgan
Daftarga solasanmu?
— Dema faqat varaqdan,
Joy olgusen yurakdan,
Uchqunmisan shafaqdan
Yoinki lolasanmu,
Yoqut piyolasanmu?
1959-1968