​​#нимадир.

Охирги пайтлар педофилия ҳолатлари жуда кўп содир бўлаётгандай...
Ойда икки марта, уч марта эшитиб қоляпмиз: жабрдийда қизчалар 7 ёш, 10 ёш, 12 ёш...
Она сифатида албатта бу ҳолатларни тез-тез қулоққа чалинаётгани мени ҳам ҳавотирга соляпти, очиғи...
Қизларимга имкон қадар тушунтиришга ҳаракат қиляпман: бегона одам кўчада савол берса жавоб берма, ёнидан тез узоқлаш, ҳилват жойларга, қурилиш бўлаётган объектлар яқинига бора кўрма, бошқа подъездларга бош суқма ва хокозо.
Иш шу даражага бордики, бу ёз қизларимни кўчага ҳам кам чиқарадиган бўлдим. Бирга олиб чиқаман, эрталаб азонда пиёда юриш қиламиз, ўшанда кўчани кўрсатаман, кейин кун давомида ҳам қуёшдан сақлайман, ҳам кўчага чиқазвориб уйда юрагим пўкиллаб ўтиргим келмайди.
Кимдир "вой бў, жа у даражада ҳавотир олиб нима?" деса керак. Лекин ҳозирги ҳолатда шу чора тадбирни қилиб турган зарар қилмайди. Педофилларга берилаётган жазо унинг жамиятга етказаётган зарари олдида унчалик оғир жазо эмас.
У қачондир қайтиб чиқади ва яна ёш умрларни ҳазон қилишда давом этади. Бир воқеа ҳалигача ичимни титратиб туради. Лекин анча бўлиб кетди, уни эшитганимга...
Камбағал ва фақирона кун кечираётган оиланинг 10 ёш ўғли онаси ивитиб берган қатиқларни уйма-уй сотиб юради ва кунлардан бир кун уни бир бачавоз зўрлайди. Камбағал оила одамлар ўртасида гап сўз кўпайиб кетмасин деб буни яширишга ҳаракат қилади.
Аммо ўша эркакнинг болани таъқиб қилиши давом этгач, она милицияга ариза топширади лекин ҳеч нарсани исботлай олмайди. Чунки суд тиббий экспертизасига ҳам зўрлик асоратлари йўқолмасидан мурожаат қилиш керак. Бўлмаса ҳеч нарсани аниқлаб бўлмайди.
Иш ёпди-ёпди бўлган. Орадан анча ўтиб мен шу воқеани эшитган опахонимиздан ўша ишнинг охири нима бўлганини сўрадим. Эшитган жавобим юрагимни зирқиратди.
Бачавоз эркаклар ёш болани шунақа бадном қилгач, ўзига ўхшаганлар билан бу маълумотни бўлишаркан ва ўша маҳлуқлар ҳам завол топган болаликни топташда унга шерик бўла бошлашаркан.
Фақирликнинг энг ёмон жиҳати шу! Ҳаққи топталади, уни қарор топтиришда қўли калталигини ҳис қилиб жим юрганлар кўп. Биз инсонлар қалбидаги нафрат нимадан пайдо бўлганини тушунмаймиз, баъзида.
Ҳеч бир нафрат ўз-ўзидан пайдо бўлмайди, у иложсизлик меваси!
Оналарга қиздир, ўғилдир-фарзандингизга доимо кўз қулоқ бўлинг дейман. Иложи бўлса қизингизни ёнингизга олиб тушунтиринг. Кўп нарсани айтолмаймиз, тўғри, аммо альтернатив нарса ўйлаб топиб уни хушёрликка чорлаш мумкин.
Ман қизларимга "ҳозир жуда кўп болачаларни ички органларини олиш учун ўғирлашяпти, сен агар бегона одамни кўрсанг ёнига бора кўрма, юр нарса олиб бераман деса, қоч!" деб ўргатяпман.
Бошқачасига тушунтиришни, огоҳликка чорлашнинг иложи йўқ. Қизалоқлар бу-Жаннат райхонлари, улар бағримизда хотиржам. Аммо уларни асраш керак, эҳтиётлаш зарур!
Янаям Аллоҳ асрасин!
Азизахон Исмоилова.