ХххххххХ

Тамычыда уллу тенгизни тузу,
Къар хапуда Минги чыранны бузу.
Будай башда акъ гыржынны татыуу,
Чууакъ кёкде жарыкъ тангны атыуу.
Тотур гокка тау гюллени айбаты,
Дарман хансла табийгъатны къыйматы.
Кюн таякъда исси кюнню къызыуу,
Состар ташда тик къаяны базыуу.
Жолоучуну аякъ ызы- жолунда,
Жёге таякъ- таянчагъы- къолунда.
Ахшы болсун жолгъа чыкъгъанны жолу,
Чомарт болсун юлюш этгенни къолу.
Ата сёзде кертиликни тамыры,
Ана кёзде дуниялыкъны сабыры.
Адам Улу адамлыгъын атмасын,
Ата журтун бир заманда сатмасын!
Жангы тангла огъур кюнде атсынла,
Жазла, къышла ызларына къайтсынла.
Жашау чархы тохтамайын бурулсун,
Бар аманлыкъ жер сайындан къурусун!
АХМАТЛАНЫ ЛЮБА 🌷