''Бўлар экан Худо айтгани''

Кўнгил экан кўйида кетдик
Йўл тополмай қолдик қайтгани
Охир биз ҳам тушуниб етдик
Бўлар экан Худо айтгани
Қанча боқдик кўз ҳам толмади
Йиғлаб айтдик бўз ҳам қолмади
Айтилмаган сўз ҳам қолмади
Бўлар экан Худо айтгани!
Дарё бўлиб оққанлар туриб
Этагини қоққанлар туриб
Умр бўйи боққанлар туриб
Бўлар экан Худо айтгани!
Умр бир тўлғонар толарсан
Солсанг бир кун ғавғо соларсан
Ҳали одам бўлиб қоларсан
Бўлар экан Худо айтгани!
Бир кам дунё бир камдир доим
Келса ҳам шу қиёмат қойим
Тақдирга тан бердик Худойим
Бўлар экан Худо айтгани!
Кўнгил экан кўйида кетдик
Йўл тополмай қолдик қайтгани
Мана бугун тушуниб етдик
Бўлар экан Худо айтгани!