Оҳ, жоним, деб ўлгинг келар, ўлиб бўлмас,

Дарё бўлиб тўлгинг келар, тўлиб бўлмас,
Бу дунёда бўлгинг келар, бўлиб бўлмас,
Керакмиди сенга кўнгил, шу кўнгил?!
Битта эдинг, сен бир дунё эллар бўлдинг,
Ёмғирсиз ҳам ёмғир бўлдинг, селлар бўлдинг,
Наҳотки сен бир кеб кетар еллар бўлдинг,
Керакмиди сенга кўнгил, шу кўнгил?!
Қараб турсанг чия бўри бўри бўлар,
Йиқилмаган теракчалар сўри бўлар,
Бу жоҳиллар дастурхоннинг тўри бўлар,
Керакмиди сенга кўнгил, шу кўнгил?!
Ор йиғлайди, лекин бир бор хор йиғламас,
Номуси йўқ номус сотар, тор йиғламас,
Эр йиғласа эл йиғлайди, зор йиғламас,
Керакмиди сенга кўнгил, шу кўнгил?!
Бу дунёдан этакларин қоққан қанча,
Осмон бўлиб осмонларга боққан қанча,
Яхши қолиб, ёмонларга ёққан қанча,
Керакмиди сенга кўнгил, шу кўнгил?!
Яхшиликка йўйгинг келар, йўймоқ қани,
Бу дунёдан тўйгинг келар, тўймоқ қани,
Парвонадек куйгинг келар, куймоқ қани,
Керакмиди сенга кўнгил, шу кўнгил?!
Азамат Исмоилов