🎨🎉 Таче, 16 сентябрьыште, Российын сулло, Марий Элын калык сӱретчыже Иван Ямбердов 69 ияш лӱмгечыжым палемда.

Иван Михайлович 1955 ийыште Юлсер кундем Чодыраялыште шочын. Уста марий сӱретче 1983 ий гыч Россий художник ушемын еҥжылан шотлалтеш. Тудо ятыр портрет ден пейзажын авторжо. «Сандалык», «Йошкар имне-влак», «Ӱшан», «Овдасола-92» да «Мӱкш отар» сӱретше-влаклан 1993 ийыште кугыжаныш премий дене палемдалтын.
🖼 Иван Михайловичын пашаже-влакым Российысе тӱрлӧ оласе да йот элласе тоштерлаште ужаш лиеш. Иван Ямбердовын икмыняр сӱретше тыгак мемнан «Кугарня» редакцийыштына аралалтеш.
🎂Иван Михайловичым «Кугарня» газет редакцийын коллективше алал кумылын лӱмгечыж дене саламла. Ончыкыжымат у, шонаш таратыше радынам шочыкташ тыланена. Шочмо кече дене!
📸Петр Васильевын фотожо.