Шошо шуэш — витамин кӱлеш

24 февраль – 2 март – Иммунитетым пеҥгыдемдыме арня (1 мартыште палемдалтше Иммунитетын тӱнямбал кечыже вашеш)
Иммунитет – организмнам тӱрлӧ чер да микроб деч аралыше пӱртӱс механизм. Шукыж годым тудо инфекций-влакым сеҥаш полша, но иммунный системе лушкыдо гын, тӱрлӧ чер организмым вашкен авалта. Поснак йоча, илалше еҥ да мӱшкыран ӱдырамаш-влакын иммунный системыштлан полыш кӱлеш.
Иммунитетым пеҥгыдемдаш полшымо нерген Марий Элысе Тазалык аралтыш министерствын эмлыме-профилактике паша да лицензирований пӧлкан советникше Наталья Чегаева умылтара.
Иммунный системылан нагрузко сезонный да сезонный огыл эпидемий, тыгак стресс годым чот логалеш. Шукыж годым телым черланена: яндар южыш шагалрак лектына, кече волгыдо огеш сите, кукшо южан пӧлемыште шуко жап шинчена. Садлан тыгай пагыште витаминым йӱмӧ нерген шоналтыман.
Иммунитетым пеҥгыдемдаш манын, организмлан витамин шуко кӱлеш, садлан сайын кочмана. Туге гынат витамин ден минерал-влакым ситарыме годым мом кочмо гдеен веле серлагаш огеш лий.
Д витамин иммунитетым пеҥгыдемдаш полша. Тудо организмыште шке семынат ышталтеш, но тидлан кечыште кужу жап лийман. Садлан кечыште кужун коштмо дене пырля теҥыз колым чӱчкыдынрак кочман.
Вегетарианец да шоҥгыеҥ-влакын организмыштышт шукыж годым В12 витамин огеш сите. Тыгодым вӱр удан ышталтеш, нерве системын пашаже пужла, иммунитет лушкыдемеш. Стресс, йӱдым пашам ыштыме да удан малыме годым В тушкаш пурышо витамин организм гыч вашке кая. Садлан шыл да шӧр-торык кочкышым, отызан кушкылым да шӱрашым утларак кочман.
Магний шкем ласкан кучаш полша.