🗒 25-31 август – Спортын чолга видше-влак дене палдарыме арня.

Физически чолга лиймаш – таза илыш-йӱлан тӱҥ ужашыже. Туге гынат кызыт шукынжо шагал тарванылыт. Шуко шинчыме тазалыклан эҥгекым конда. Тидын нерген Калык тазалык да медицине профилактике рӱдерым вуйлатыше Надежда Фролова каласкала.
Шинчен пашам ыштыме коям погымашке (ӧрдымашке), шӱм-вӱргорно чер, сакыр диабет, эсогыл южо рак дене черланымашке шуктен кертеш. Физически чолга лийме нине нелылык деч утлаш полша. Кузе?
🔹 Тазалык саемеш, шӱм-вӱргорно системе пеҥгыдемеш, айдеме чытышанрак лиеш, вӱрыштӧ холестерин иземеш.
🔹 Вий-куат ешаралтеш, кумыл нӧлталтеш. Физически чолга еҥ-влак палемдат: тренировко деч вара вий ешаралтмым шижыт.
🔹 Омо саемеш, мален колташ куштылгырак.
🔹 Тургыжланымаш шагалемеш.
🔹 Вуйуш сайынрак пашам ышта, ятыр йодышым решатлаш куштылгырак.
Тыглай илышыште физически чолга лияш ятыр йӧн уло:
🔸 яндар южышто коштса. Ласкан ошкедаш лиеш, тидат чогашылым да шӱм-вӱргорно системым пеҥгыдемдаш полша. Кечыште пел шагат деч шагал огыл коштман;
🔸 велосипед дене кудалыштса. Тудо чытышанрак лияш да чогашылым пеҥгыдемдаш полша;
🔸 залыште тренироватлалтмат тыгаяк пайдам пуа. Арняш кок-кум гана тренировкым эртарыман;
🔸 куштымаш – физически чолга лияш чапле йӧн. Арняште кок-кум гана кушташ темлалтеш;
🔸 паша верыштат упражнений-влакым ышташ жапым муман. Тыглай пӱкеным фитнес-мячлан але теҥгыл-пӱкенлан алмаштымат пайдале. Тиде капкылым кучаш полша, коварче да йол чогашылым пеҥгыдемда.
🔸 Тылеч посна вургемым мушмо, пӧртым эрыктыме, сад-пакчаште тӱрлӧ сомылым шуктымо физически чолга лияш полшат.
Фитнес, куштымаш, йога да моло физический упражнений дене тӱшкан заниматлыме тазалыклан пайдале веле огыл, тыгак йолташ да лишыл еҥ-влак дене жапым оҥайын эртараш сай йӧн.
Да шарныман: сай лектышыш шуаш манын, тӱрлӧ упражненийым ыштыман. Мутлан, кардио-упражнений (йолын коштмаш але куржталмаш) дене пырля силовой тренировко дене заниматлыме да «растяжкым» ыштыме тазалыкым аралымаште пайдалырак улыт.
Но занятий деч ончыч врач дене каҥашыман, поснак тазалык дене нелылык улмо годым але физический нагрузкым пуаш ок лий гын.
Физический упражнений ийготлан, вийлан да тазалыклан келшен толшаш.
Сай тазалык лийже манын, арняште 150 минут деч шагал огыл жапым тарванылмылан ойырыман. freepik.com сайт гыч налме фото.