Тропарь, глас 8

Якоже плод кра́сный Твоего́ спаси́тельнаго се́яния,/ земля́ Росси́йская прино́сит Ти, Го́споди,/ вся святы́я, в той просия́вшия./ Тех моли́твами в ми́ре глубо́це/ Це́рковь и страну́ на́шу Богоро́дицею соблюди́, Многоми́лостиве.
Другой тропарь, глас 4:
Иерусали́ма Вы́шняго гра́жданы,/ от земли́ на́шея возсия́вшия/ и Бо́гу во вся́цем чину́ и вся́ким подви́гом угоди́вшия,/ прииди́те, воспои́м, ве́рнии:/ о, всеблаже́ннии земли́ Росси́йския засту́пницы,/ моли́теся ко Го́споду,/ да поми́лует сию́ от гне́ва Своего́,/ исцеля́я сокруше́ние ея́,// и ве́рныя лю́ди Своя́ уте́шит.
На полиелее священники поют величание
Пресвятой Троице:
Велича́ем Тя,/ Триипоста́сный Влады́ко,/ ве́рою Правосла́вною зе́млю Ру́сскую озари́вшаго/ и святы́х сро́дников на́ших// сонм ве́лий в ней просла́вльшаго.
И сразу же величание Пресвятой Богородице:
Досто́йно есть велича́ти Тя,/ Богоро́дице,/ земли́ Ру́сския Цари́цу Небе́сную/ и люде́й правосла́вных// Влады́чицу Держа́вную.
И величание святым:
Ублажа́ем вас,/ чудотво́рцы на́ши сла́внии,/ зе́млю Ру́сскую доброде́тельми ва́шими озари́вшии/ и о́браз спа́сения нам// светоявле́нно показа́вшии.
Все святые, молите Бога о нас!