У гэты дзень, 8 верасня 2013 года адбылася прэм'ера спектакля "Хрыстос прызямліўся ў Гародні" па аднайменнаму раману Ул.

Караткевіча.
Інсцэніроўка, пастаноўка і сцэнаграфія Міхася Краснабаева.Кампазітар заслужаны дзеяч мастацтваў Рэспублікі Беларусь, лаўрэат Дзяржаўнай прэміі, народны артыст Беларусі Сяргей Картэс.Касцюмы Святланы Макаранка.Пластыка і харэаграфія Дзіяны Юрчанка.
У сярэдзіне XVI стагоддзя беларускі шкаляр Юрась Братчык (Дзмітрый Каваленка) ступае на шлях барацьбы са сквапнасцю і зайздрасцю, здрадай і забойствам, жорскасцю і глупствам. Народны Хрыстос кахае, стварае «цуды», аддана любіць сваю Радзіму, змучаную і абрабаваную. У пратэсце супраць несправядлівасці за ім ідуць людзі: «… хто б ты ні быў, ты з намі ў адну дуду дзьмеш, аднолькавыя поршні носіш, галадаеш як мы. Даў ты нам хлеб. І яшчэ… даў ты нам веру… Павінен быў ты прыйсці!».З махляра і валацугі Юрась Братчык ператвараецца ў мысляра, пакутніка, праўдашукальніка.
Акрамя Дзмітрыя Каваленкі, успектаклі ігралі такія выдатныя акцёры-коласаўцы, як народны артыст Беларусі Тадэвуш Кокштыс, заслужаныя артысты РБ Рыгор Шацько, Георгій Лойка, Вячаслаў Грушоў, Віктар Дашкевіч, артысты Валянцін Цвяткоў, Алена Шарэпчанка і іншыя.