ՊԱՊ ԹԱԳԱՎՈՐԻ ԲԱՐԵՓՈԽՈՒՄՆԵՐԻՑ .

ԵԿԵՂԵՑԻ
... Փոքր անց Պապը կանչեց Երեմիային և կարգադրեց .
-- Գրել մի հրաման՝ շեներում ,քաղաքներում և ավաններում կարդալու , որ այսուհետ վերացվում է եկեղեցուն , վանքերին ու մենաստաններին տրվող տասնորդն ու պտղին և թողնվում է միայն արքունի տուրքը :
-- Բայց դա կարգ է ,արքա , տակավին երանելի Տրդատ արքայի օրով ,- զարմացավ հազարապետը:
-- Կա՜րգ ...,սահմանված վաղուց ի վե՜ր ,- կրկնեց Պապը ,- սակայն , հազարապե՛տ , մի՞թե մի երկրում ,ուր կա թագավոր , կարո՞ղ է լինել մի քանի իշխանություն , մի քանի հրամայող :
Սակայն այստեղ՝ Հայոց աշխարհում , իշխանություն են անում ամենքը՝ անգամ վանահայրերը , սարկավագները :
Այլ ի՞նչ է մնում ինձ . այն գուցե , որ գնամ եկեղեցու հայրերի մոտ և խնդրեմ կառավարել ինձ ևս :
-- Թույլ տուր իմանալ ,արքա ,թե ինչ են ապօրինի արել մեր հոգևորները ,- հարցրեց իշխան Ամատունին:
Եվ դու թույլատու՞ ես լինում , հազարապետ , որ այդ հոգևորները կողոպտեն երկիրը : Եթե եկեղեցին ու վանքերը տանեն ամենը՝ շինականի հացը՝ իբրև տուրք և պտղի , ինչո՞վ վճարի նա արքունի հարկը , և մենք ինչո՞վ պետք է զորացնենք մեր բանակը : Խորհե՞լ ես այս , տեր Ամատունի : Ոչ անշուշտ :
-- Կդժգոհեն ,արքա , - ասաց նա մտահոգ ,- և այդ ամենը կարող է ծանր հետևանքներ ունենալ :
-- Դու ինձ վախեցնու՞մ ես , հազարապետ:
Եվ ուրե՞մն , հազարապետ ,- խորհուրդ ես տալիս ,որ ես հնազանդվե՞մ նոցա :
Եթե կարելի է տուրքեր հավաքել , ինքս պիտի հավաքեմ բանակ պահելու ,որ երկրի սահմանները ապահովեմ թշնամիներից , իսկ ՀՈԳԵՎՈՐԱԿԱՆՆԵՐԸ ՈՉ ԵՐԿԻՐ ԵՆ ՊԱՀՈՒՄ , ՈՉ ՍԱՀՄԱՆՆԵՐ ԱՊԱՀՈՎՈՒՄ...
Թող ապրեն իրենց հողերով ,որ նույնպես շատ է :
Եվ անհասկանալի է ինձ , թե ինչու՞ է Ներսեսը մեր աշխարհը լցրել հոգևորներով : Ամեն քայլափոխի հանդիպում ես վարդապետի , սարկավագի , եպիսկոպոսի և քահանայի :
Եվ ինչու՞ ...
Թվում է ինձ , որ յուրաքանչյուր շենում բավ է մի քահանա , իսկ աբեղաների կեսը տուրքեր հավաքելու փոխարեն կարող են մտնել բանակ
Պետք է այս ևս գրել հրամանում ,- տաքացավ Պապը:
Մյուս օրը մագաղաթի վրա գրված հրամանը , թագավորի կարմիր ստորագրությամբ , սուրհանդակները տարան Հայոց աշխարհի շեներում , ավաններում ու քաղաքներում կարդալու:
Ստ. Զորյան , ՛՛ Պապ թագավոր ՛՛ պատմավեպից հատված