Коса шачендыхть шкайликне

Мзярда ошсь вайси шобдати, Саранск ошень духовнай семинариять фкя уженясонза, мярьгат, лоткси пингсь. Тяса, шкайликонь сёрмадомань кружокса, «шаченды» афкуксонь чуда. Эрь-кодама профессияса заняф ломаттне сашендыхть тяза, штоба тиемс сянь, мезсь кармай «корхтама» ваймоцень мархта. Фкя илядня монга сувань семинарияв, штоба эсь сельмоса ваномс, кода шачендыхть шкайликонятне и кит синь сёрмадысна.
Тяса васьфтемань лямбе мзолфкя мархта авась. Шарьхкодень: тя Галина Владимировна, конань мархта надияфтонь васедемс. Галина Кавказовась покоди духовнай семинарияса, тонафты шкайликонь сёрмадома. Сон получась художественнай образования Чувашияса, покодсь Москуса, сяда тов тонафнесь иконописнай факультетса. Тейне-арам, сонь ульсь сембоц: дизайнеронь фирмац, кельгома покодема вастоц. Но эряфсь ладявсь лиякс. Сонь пяк мялецоль тонафтомс лиятнень сянди, мезть кельгозе сонць—шкайликонь сёрмадома.
Мордовскяй и Саранскяй митрополитть Зиновиень бславаманц коряс 2017 кизоста сявомок Саранскяень духовнай семинарияса ушедсть сёрмадома шкайликонят. Тяза сашендыхть питнефтома, пуромкшнихть сят, кит кельгсазь тя тевть. Пара, кда ломанть ули художественнай образованияц. Но фкя инь васенцесь—тя Шкайти кемамась. Соньфтемонза аш кода!
Надежда Викторовна Жамковать эсь ёню ванфонц мархта ули кода лувомс тя вастонь ванфтыкс. Теенза 75 киза. Шкайликонь сёрмадомань кружокс сашенды панжемстонза васенце шиста сявомок—кафкса кизот ни. Няезе церькавса объявлениять, и седиец сонць азозе: тя ся, мезсь эряви. Авась лама киза покодсь инженеркс-конструкторкс, а тяни сон художник, кона тиенди валдта и лямбода пяшксе ликонят.
«Мзярда повонь Надежда Викторовнать пяли инжикс, няйф мазышить эзда нльне таяскодонь. Сяшкава тусть мялезон сёрматф шкайликонянза, што монга кармань сашендома тяза»,—азозе кружоконь нинге фкя участницась.
Ликонянь сембода од сёрмадыти кемзисемге киза. Аф ваномок одксшинц лангс, тевоц лисенди аф кальдявста. Шкайликонянь сёрмадомась цёрати аф аньцек кельгома тев, но и Шкайти сяда малакс улема.
Конешна, аф сембе кирневихть тяса ламос. Шкайликонь сёрмадомась–аф тёждя искусства, кона веши кирдемшка, эсь лацонь мяльхть-арьсемат. Но сят, кинь седис-ваймос кемоста педенди тя тевсь, арсихть афкуксонь семьякс. Тяса аш васта сельмонь каямати, соперничендамати–аньцек фкя-фкянди лездома, фкя-фкянь ширень кирдема и фкя-фкянь инкса кеняртькшнема.
Шкайликонять сёрмадомс максови комсь фкя ши. Васенда вешеви эрявикс материалсь—парста косьфтаф шуфта пакш. Сяльде лангсонза помаланяса тиеви рисункась—сай пингонь шкайликонять эскизоц, а меле ни ушедови архтомац-мазоптомац.
Улендсть случайхть, мзярда кружокс сашендыхнень сёрматф ликонясна лезнесть эряфса. Кепотьксонди, фкя тяштись казсь брадонц стиренцты, кона лама пинге ашезь лисев рьвкас, венцямань кафта шкайликонят, и тяда меле стирсь пуроптсь семья!
Семботь, мезсь тяштеви Саранскяй духовнай семинарияса, фалу ули кода няемс эрь-кодама выставкаса, семинариять музейсонза. Тяниень пингть аноклави выставка, кона панжеви тяддень июнь ковста.
Но сембода оцю павазсь, Галина Кавказовать валонзон коряс, няемс эсь тяштьфцень храмса, мзярда сон кармай аф аньцек тонь, а сембе ломаттнень.
Мон ащень тя сетьме вастть эса аф кржа пинге и коль арьсень: шкайликонь эрь тяштись тяса аф аньцек художник, а ломань, кона эсь сёрматфонзон вельде няфнесы Шкайти кемамать и кельгомать. А тумстон прязон сась мяль: «Ужяль, пяк ужяль, мес мон аф маштан шкайликонь тяштема...».
Лилия Байчурина.