Муус устар 27 күнэ - Саха Өрөспүүбүлүкэтин күнэ.

Бу кэрэ-бэлиэ ураты күнү Сүлэ нэһилиэгэ өрөгөй үөрүүнэн көрүстэ.
Ол курдук өрөспүүбүлүкэ былааҕын,аалай кыһыл сибэкки дьөрбөтүн туппут нэһилиэк дьоно-сэргэтэ маанытык таҥнан-симэнэн, оскуола диэки хотоҕостуу субустулар. Оскуола тэлгэһэтэ маҥан, кыһыл, күөх саарыктары туппут үөрэнээччилэр үөрбүт-көппүт саҥаларынан чугдаарда. Киирии аан таһыгар Саха Өрөспүүбүлүкэтин судаарыстыбаннай диэйэтэлэ, Саха сирин үөрэҕириитигэр, култуура уонна ускуустуба сайдыытыгар сөҕүмэр кылааты киллэрсибит биир дойдулаахпыт, наркуом, үөрэх миниистирэ С.С.Сюльскай бюһа, тахсар күнү уруйдуу, кэнчээри ыччатын айхаллыы көрүстэ.
Үөрүүлээх тэрээһиммит аан чааһын оскуола 3 кылааһын үөрэнээччитэ Ваня Гаврильев ыраас чуор куолаһынан төрөөбүт дойдутун айхаллаан аста, өрөспүүбүлүкэни турууласпыт сүдү дьоннорбутугар барҕа махталын туһаайан, мустубут дьону өрө көтөҕүллүү биир тыыныгар киллэрдэ. Ваня уруй-айхал тылларын 4 кылаас үөрэнээччитэ Ян Николаев П.А.Ойуунускай "Син биир буолбаат?" диэн хоһоонун ааҕан, тэрээһини өссө киэргэттэ, дьон кутун тутта.
Нэһилиэк баһылыга Иванов Д.Ю. бар-дьонун кэрэ-бэлиэ күнүнэн эҕэрдэлээтэ, өрөспүүбүлүкэни төрүттэспит чулуу дьоннорбут туһунан сырдатта, ыччаттарга туһаайан үтүө дьоммут холобурдарын батыһан дойдубутугар бэриниилээх дьон буолуҥ диэн алгыһын эттэ.
Бу үөрүүлээх тэрээһиммитигэр үөрүүбүтүн үллэстэ, дьоһун-мааны ыалдьыт буолан кэллилэр: Ньурба оройуонун дьокутааттарын сэбиэтиттэн дьокутаат Осипов П.А., ИСУ начаалынньыга Иванов К.Р.. Бэрэстэбиитэллэр нэһилиэк дьонун бырааһынньыгынан эҕэрдэлээн туран, Сүлэ үөрэнээччилэригэр төрөөбүт дойдуларын түһэн биэрбэт курдук үчүгэйдик үөрэнэллэригэр, өрөспүүбүлүкэни олохтоспут чулуу дьоннорбут курдук үүнэн тахсалларыгар барҕа баҕаларын тиэртилэр.
Оскуола дириэктэрэ Герасимов И.В., оскуола үлэҕэ,оҥорон таһаарыыга дириэктэри солбуйааччы Гаврильев И.Д. өрөгөй күнүнэн эҕэрдэлээн туран, кэнчээри ыччакка эмиэ кэс тылларын эттилэр.
Маргарита Николаева, бибилэтиэкэр.