Чуукаарга Саха Өрөспүүбүлүкэтин өрөгөйүн күнэ

Муус устар 27-р, Саха Өрөспүүбүлүкэтин өрөгөйүн күнүгэр Чуукаарга Степанов Н.С. аатынан Кыайыы болуоссатыгар олус сэргэх бырааһынньыктааҕы дьаһал ыытылынна. Тэрээһин нэһилиэк аҕа баһылыга Федоров А.Ю. эҕэрдэ тылыттан саҕаланна. Ол кэннэ кулууп дириэктэрэ Ульяна Иванова мустубуттары эҕэрдэлээн туран күрэх саҕаламмытын биллэрэн, түөлбэлэр икки ардыларыгар ”Мааныһыт сандалы” диэн хотойорунан сахалыы астаах сандалы күрэҕэ буолла.
Манна туох суоҕай? Алаадьы, эбээ баахылата, көбүөрдээх лэппиэскэ, онтон да атын бурдук астар. Үүттэн-сүөгэйтэн оҥоһуллар үрүҥ ас эгэлгэтэ, быппахтан саҕалаан уоһах үүт сыырыгар тиийэ. Убаһа, сүөһү этиттэн бүлүүдэ арааһа: кутуллан буспут хаан, чохочу, таҥсык, сыалаах ойоҕос, үтэһэлээх эт, таба тыла о.д.а. Ону таһынан булт этэ мас көтөрүн этиттэн андаатарыгар тиийэ. Балык буспута, туустааҕа, тоҥнуу кыһыллыбыта.
Бэйэбит ойуурбутугар-тыабытыгар үүнэр отоннортон утахтар. Барыта олус сиэдэрэйдик сахалыы иһиттэргэ ууруллубуттара ураты көстүү. Күрэх балаһыанньатын быһыытынан сахалыы таҥастаах буолуу биһирэнэрин ааһан сыаналанар буолан бары кэриэтэ сахалыы таҥныбыттара бырааһынньыктыы көстүүнү үөскэтэр.
Остуоллары,таҥастары дьүүллүүр сүбэ көрбүтүн кэннэ күүгэннээх күөрчэҕи бириэмэҕэ ытыйыы күрэҕэ дьон көҕүн күүркэттэ. Манна “Эбэ” түөлбэттэн эр киһи ытыйбыта биһирэбиллээх буолла. Салгыы спорт зал үлэһитэ Любомир Иннокентьев салайыытынан алта түһүмэхтээх сахалыы оонньуулар күрэхтэрэ буолан мустубуттар болҕомтолорун тарта.
Кыаһыланыы, дулҕалаах сиринэн сүүрүү, хорох оту үрүдүнэн ыстаныы, кириэс тэбии, көтөх ынаҕы туруоруу, ойбонтон уулааһын күрэхтэрбит ааттара да этэринии эмиэ да көрдөөх, эмиэ да тыҥааһыннаах дьиҥ кыанар киһи ааһар күрэстэрэ буолла. Манна кыттааччылартан ордук 11 кылаас үөрэнээччитэ Родион Данилов чорбойдо.
Бу күрэхтэр уопсай түмүктэринэн дьүүллүүр сүбэ сыаналаабытынан “Уһун Күөл” түөлбэ – I, “Хампах” –II, “Эбэ” – III тиксэн грамоталарынан олохтоох ип. Афанасьева Н.М. “ДариЯ” маҕаһыыныттан атыылаһар араас суумалаах сертификаттарынан наҕараадаланнылар.
Маны сэргэ “Сааскы киһи салбаммытынан” диэн атыы-эргиэн дьаарбаҥкатыгар биирдиилээн дьон бэйэлэрин бородууксуйаларын уонна “ДариЯ” маҕаһыын бэйэлэрэ бэлэмнээбит “индигирка” салаатыттан саҕалаан “Цыпленок табака” тиийэ бырааһынньыктааҕы остуол эгэлгэ бүлүүдэлэрин атыылаан дьон махталын ыллылар.
Киэһэтин Е.М.Поликарпов аатынан “Эйгэ” норуот айымньытын киинин үлэһиттэрин көҕүлээһининэн “Талба талааннаахтар” диэн кэнсиэр буолла. Үнүгэс оҕолор үҥкүүлэрэ, нэһилиэкпит кэрэ куоластаах ырыаһыттара, көрдөөх сыаҥкалар, монологтар толоруллан дьону сэҥээртилэр.
Бу ырыа- тойук кэрэ киэһэтин муусукаҕа уһуйааччы Виолетта Попова салайар, “Хотугу сулус “ конкуруска кыттан 3 степэннээх лауреат буолбут, “Дорҕоон Тойуга” фольклорнай бөлөх оҕолорун нүөмэрдэрэ киэргэттэ. Көрөөччүлэр сэргээбитттэрин биллэрэн махтанан тарҕастылар.
Надежда Казакова, Чуукаар.