Бүгүн, ыам ыйын 24 күнүгэр, Ньурба куорат тэрилтэлэрэ күргүөмүнэн субуотунньукка таҕыстылар.

Куорат дьаһалтата хайа тэрилтэ ханнык учаастагы ыраастыырын эрдэттэн тыырбыт буолан, тэрилтэ үлэһиттэрэ бэйэлэригэр сөп график оҥостон сорохтор сарсыарда уон чаас иннигэр тахсан хомуйбуттар, сорохтор эбиэт кэннэ ыраастаатылар.
«Кыталык» КД үлэһиттэрэ оскуолаларынан тиһэх чуораан ыытан баран, эбиэттэн киэһэ Нюрбинка үрэх уһук сытар биэрэгин ыраастаатылар.
Халлаан сайыҥҥылыы итии буолан, киһи таһырдьа эрэ үлэлии сылдьыах курдук. Халаан уута тимири–туһаҕы, араас бөҕү-сыыһы биэрэк кытылыгар хаалларан барбытын бары саба түһэн, күүстээх үлэ ыытылынна.
Анаммыт сирбитин бүтэрэн баран, куорат дьаһалтатын үлэһиттэригэр баран арыы собуотун аннын хомуйарга көмөлөстүбүт. Хомойуох иһин, хайдахтаах да халаан уута сатаан аҕалан бырахпат бөҕө эмиэ баарын, төһө кыайарбытынан ыраастыыр үлэ ыыттыбыт.
Аны аҕыйах хонугунан үрэх хочотугар күөх от үүнэн, сүөһү мэччирэҥэр бэрт буолсу.
"Кыталык" КДь.