Бөлүүн Ньурбаҕа баһаарга 2 киһи тыына быһынна

Бөлүүн 1 ч. 15 м. Ньурба к. Амакинка микро-оройуонугар Тимирязев уул. турар 2 этээстээх чааһынай дьиэ умайа турарын туһунан иһитиннэрии киирбитэ. Баһаарынайдар кэлэллэригэр иккис этэээстэн аһаҕас уот көстөрө. 26 №-дээх ОГПС 10 үлэһитэ уонна 3 тиэхиньикэ үлэлээтилэр.
Баһаарга мастан оҥоһуллубут 2-с этээс бүтүннүү уонна шлакоблок бастакы этээс ис эркиннэрэ уонна үрдэ умайда (уопсай иэнэ – 108 кв.м.). 1957 с.т. төрүөх эр киһи уонна 1963 с.т. дьахтар өлүктэрэ булулунна, буруоҕа тумнастан өлбүттэр. Баһаар төрүөтүн быһаарарга бэрэбиэркэ барар.
Ааспыт нэдиэлэ улууска элбэх баһаарынан уратылаах буолла. Ыам ыйын 21 к. Ньурба к. Убайааныгар Мелиоратордар уул. чааһынай дьиэҕэ уонна ыам ыйын 24 к. эмиэ Убайааҥҥа Буденнай переулогар турар дьиэҕэ баһаардар буоллулар.
Ыам ыйын 23 к. Ньурбачааҥҥа Бэрэ диэн сиргэ уонна ыам ыйын 24 к. Хатыыга дэриэбинэттэн 48 км-даах сиргэ ойуур баһаардара регистрацияламмыта. Авиалесохрана отделениетын байыастара үлэлээн уоту умуруордулар.
Ытыктабыллаах Ньурба улууһун олохтоохторо! Дьиэ-уокка уонна тыаҕа-ойуурга уоттан сэрэхтээх буолуу быраабыларын хайаан даҕаны туһанаргытыгар ыҥырабыт!
Улуус дьаһалтатын пресс-сулууспата.