Куоначчаанынан туорааһын бэс ыйын 10 к.

кэнниттэн аһыллара күүтүллэр
Быйылгы уратылаах халаан уута улуус суолларыгар эмиэ содуллаах буолбутун билэбит. ИСУ салайааччытын солбуйааччыта Василий Кучаров иһитиннэрбитинэн, ааспыт нэдиэлэҕэ СӨ Массыына суолларын управлениетын исписэлииһэ кэлэн, ууттан эмсэҕэлээбит Ньурба к. Нюрбинка муостатын уонна Дьаархаҥҥа 3 уулуссаны көрдө. Кинини кытта ИСУ үлэһиттэрэ сылдьан көрөн, дефективнэй аакталар толоруллубуттара. Докумуоннар СӨ Массыына суолларын управлениетын сметчиктэригэр ыытыллыбыттара. Бу нэдиэлэҕэ смета ааҕыллан, төһө харчы көрүллэрин-көрүллүбэтин быһаарыахтаахтар.
Итини таһынан Акана-Чкалов суолугар уу 5 сиринэн суолу быһан сытарын баран көрдүлэр. Хамыыһыйа уу аһардара түһэриллибит турбалар диаметрдарын улаатыннарарга быһаарыы ылынна. Манна эмиэ ааҕан-суоттаан көрүөхтэрэ.
Халаан уутун үгэнигэр Марха өрүс уута тахсан Хатыҥ Сыһыыга барар суолу быһа сылдьыбыта, хамыыһыйанан ону эмиэ тахсан көрдүлэр. Суолу уу суурайбатах, алдьаппатах. Онон грейдэринэн тэҥнээһин эрэ ыытыллыаҕа.
Оттон Маалыкай түбэтигэр суолунан сырыы хаһан олохтонуоҕай, Куоначчааҥҥа понтоннай муостата хаһан түҺэриллиэҕэй? Бу туһунан Василий Кучаров маннык хоруйдуур: «Билигин үрэхтэр уулара толору, онон уу түһэринэн көрөн суолбут аһыллыаҕа.
Маалыкай өттүгэр «Партнер» ХЭТ үлэһиттэрэ уу түһэриитигэр, суолу куурдууга үлэлии сылдьаллар. Чуукаар өттүгэр «Агроснаб» тэрилтэ экскаваторщига бу нэдиэлэҕэ тахсан уу түһэриэхтээх. Уу түстэҕинэ биирдэ, ол эбэтэр бэс ыйын 10 к. кэнниттэн биирдэ суол аһыллара күүтүллэр».
Минтранс бирикээһинэн бэс ыйын 3 к. дьоҕус кээмэйдээх суудуналарга навигация саҕаланар. Салгын олбохтоох суудуна сапчааһа суох буолан, билигин сүүрэр кыаҕа суох. Сапчаастарын сакаастаабыттара бэс ыйын 7 к. диэкки кэлиэхтээх.
Онон балаһыанньаны навигация аҺылыннаҕына арай хоһуун өрүс таксистара быһаарыахтарын сөп. Ол эрээри кинилэргэ ирдэбил сыллата күүһүрэн-кытатаан иһэрэ биллэр.
Геннадий АНТОНОВ.