Дьаархан оскуолатын түмэлигэр Борис Игнатьев олоҕун, үлэтин-хамнаһын кэпсиир экспонаттар хараллан тураллар.

Маннык баай экспонаттаах оскуола музейын көрө иликпин. Манна общественнай деятель, Сунтаар улууһун социальнай-экономическай сайдыытыгар сүҥкэн кылаатын киллэрбит Борис Григорьевич Игнатьев үрүҥ көмүс мэтээллэрэ, бочуоттаах грамоталара хараллан тураллар уонна дьиэ кэргэнин кэпсиир стендэ баар.
Маны таһынан, Куоһаан сириттэн булуллубут туой иһит кырамталара, ханнык бииһин ууһа биллибэт адьырҕа кыыл тииһэ, ойуун дүҥүрэ, былыргы ат симэҕэ киһини сөхтөрөр. Бу барыта нэһилиэк сирин-уотун, дьоно-сэргэтэ туттубут маллара буолаллар.
Дьаархан былыр олус элбэх табалааҕынан биллэр. Оттон кэлин улахан ыарыы туран симэлийиигэ барбыттар. Маныаха таба тириититтэн тигиллибит сумка оччотооҕу кэми көрдөрөн, туоһу буолан турар.
Билигин тиһэх чуораан чугдаарар кэмигэр олус тоҕоостоох пионердар туттубут маллара, ону тэҥэ ССРС кэмигэр собуокка тигиллибит оскуола формата сабыс-саҥатынан хараллан турара кэрэхсэтэр.
Бу нэһилиэккэ аан бастакы оскуола 1936 сыллаахха арыллыбыта. Онтон 60-ссылларга дойду устуоруйатын үөрэтэр, үүнэр көлүөнэҕэ билиһиннэрэр соруктаах бастакы экспонаттары хомуйан саҕалаабыттара. Үөрэнээччилэр
хас биирдии экспонаты чинчийэн араас конференцияларга ситиһиилээхтик кытталлар. Маннык баай экспонаттаах түмэли Анна Ивановна Алексеева салайар.
suntaar_ulus телеграм-ханаал матырыйаалларынан
Сигэ (ссылка): https://clck.ru/35RpdY