#НОВОСТИВЕРХНЕВИЛЮЙСКОЙЦРБ

#ВЫЕЗДНАЯРАБОТА
2023 сыл алтынньытыгар РФ Президенин дьаһалынан сэтинньи 22 күнэ Бүтүн Россиятааҕы психолог профессиональнай күнүнэн бигэргэммитэ.
Сэтинньи ый 24-26 күннэригэр биһиги улууспутугар Дьокуускайдааҕы өрөспүүбүлүкэ психоневрологическай диспансерын мобильнай биригээдэтэ үлэ сырыытынан кэлэн барда..
Биригээдэҕэ медицинскэй психолог Калачикова Алена Николаевна, психиатр Верховцева Валентина Николаевна, психолог Лазарева Виктория Ивановна үлэлээтилэр.
Командировка сыалынан Анал байыаннай дьайыы кыттыылаахтарыгар, кинилэр дьиэ кэргэттэригэр, аймахтарыгар психологическай көмөнү оҥорууга Киин балыыһа медицинскэй үлэһиттэригэр, үөрэх тэрилтэлэрин учууталларыгар, псхологтарыгар, социальнай педагогтарыгар, сүрүннээн «Психосоматическай кэһиилэр», «Посттравматическай стресс кэһиилэрэ» боппуруостары дьүүллэстилэр, сүбэ-ама ыйылынна.
Мобильнай биригээдэ биир күнү Анал байыаннай дьайыы кыттыылаахтарыгар, кинилэр дьиэ кэргэттэригэр, аймахтарыгар психологическай көмөнү оҥорууга анаатылар.
Төһө да бириэмэлэрэ ыгым буоллар, быыс булан көрсөн, нэһилиэнньэни кытта үлэ, диспансер ыытар үлэтин-хамнаһын, туһунан ыйыталастым.
Калачикова Алена Николаевна, өрөспүүбүлүкэ психоневрологическай диспансерын иһинэн тэриллибит психотерапевтическай Киин медицинскэй психолога:
Биһиги мобильнай биригээдэбит Дьокуускайга өрөспүүбүлүкэтээҕи психоневрологическай диспансер (ЯРПНД) иһинэн Анал байыаннай дьайыы буолуоҕуттан тэриллэн үлэлиир. Былаан оҥостон, улуустарынан сылдьан үлэлиибит. Сыалбыт диэн, Анал байыаннай дьайыы кыттыылаахтарыгар, кинилэр дьиэ кэргэттэригэр, аймахтарыгар психологическай көмөнү оҥоруу буолар. . Биригээдэҕэ психиатр, психотерапевт, медицинскэй психолог киирэллэр. Бары ити диспансер үлэһиттэрэбит. Сыалбыт соругун чопчу тутан этэр эбит буоллахха, сүрдээх ыарахан. Киһи ылбычча биир тылынан этэн, быһааран кэбиспэт. Араас дьылҕа, араас майгы- онно барытыгар бэлэмнээх эрэ буоллахха, үлэбит үчүгэй түмүгэ көстөр.
Биһиэхэ, псхотерапевтическэй Кииҥҥэ, пациеннары психиатрдар ыыталлар. Бу киһиэхэ психологическай көмө наада, үлэлэһиҥ диэн.
Кылгастык үлэбит тутулун билиһиннэрдэххэ, психолог пациеҥҥа итэҕэлгэ киирэн, кини арылларын ситиһиэхтээх, маны сатыахтаах. Биһиги, психологтар, анал туттар техникалардаахпыт, методикалардаахпыт, Пациены кытта бастакы көрсүһүүбүт кэмигэр анаалыстаан, бэйэбит испитигэр сыаналаан көрөн, киниэхэ ханнык техниканы ду, ньыманы ду туттарбытын быһаарынабыт. Ол кэннэ, ыксаабакка эрэ, пациент аа-дьуо арылларын ситиһиэхтээхпит. Психолог сүбэ-ама биэрбэт, пациент бэйэтэ ис туругун анаалыстанан, толкуйдаан, туох мэһэйдээн сылдьарын буларга бэйэтэ тиийиэхтээх. Оччоҕуна, ону туоратынарыгар хайысханы таба тайанарыгар салайан эрэ биэрэбит. Наһаа судургу үлэ буолбатах, хас биирдии киһиэхэ тустаах дьайыыны булуоххун наада. Кыыһыра, ыгылыйа сылдьар киһиҥ, бастаан агрессивнай майгытын көрдөрөн киирэн барыан сөп, онуоха биһиги аахсан киирэн барбакка, киниэхэ сөптөөх сыһыаны булуохтаахпыт.
Онтубут бириэмэлээх. Холобура биир киһиэхэ 1 чаас көрүллэр, онтон 50 мүнүүтэтин кэпсэтиигэ ыытабыт, 10 мүнүүтэтин докумуону кытта үлэҕэ аныыбыт. Консультация наһаа-уһаан-тэнийэн хааллаҕына, көдьүүһэ сүтэр, сэлэһии эрэ курдук буолан хаалар. Оннук сэлэһии туох да түмүгү биэрбэт, бириэмэни сүтэрии курдук буолар. Дьэ ол иһин бириэмэ тутуһуллара хайаан да наада. Уйулҕатыгар охсуута улахан буоллаҕына, бэриллибит бириэмэ иһигэр бу киһи арыллара ыарахан, оччоҕо эмиэ ыҥырабыт, оннук, ортотунан уончаҕа тиийэ сылдьыан сөп. Маннык дьоҥҥо биир консультация сөп буолбат. Ону пациеммытын кытта былааннаан эрдэтинэ быһаарсабыт, травмаҥ төһө охсуулааҕыттан, баҕар хас эмит сырыынан уһуохпутун, эбэтэр, түргэнник бүтүөхпүтүн сөп диэн. Пациент ону эмиэ өйдүүр, бу бириэмэ иһигэр тугу эмэ ситиһиэхтээхпин диэн санаатын сааһыланар, сыта-олоро толкуйдуур. Сорохтор, бастакыттан арыллар дьон эмиэ баар. Кинилэри кытта үлэлииргэ чэпчэки, Оннук дьон санаа баттыгыттан түргэнник тахсаллар, туруктара тупсар.
Оҕолору кытта кэпсэтии ньымата туттуллубат, кинилэргэ тест сөп түбэһэр,холобурга , уруһуйунан тест. Ол уруһуйун түмүгүн бэйэбитигэр бэлиэтэнэбит, оттон наада буоллаҕына, анаалыстаан ырытыһыы кини төрөппүттэрин эрэ кытта барыан сөп.
Психотерапевтическай кииммитигэр күнүскү стационар туһунан кылгастык билиһиннэрдэххэ, манна комплекснай үлэ бөҕө ыытыллар: сарсыарда кэлэн анализ туттараллар, систиэмэлэрин туруоттараллар, таблеткаларын иһэллэр, укуолларын ылаллар, психолог, психотерапевт консультациятыгар сылдьаллар, өскөтүн бэйэтэ кыанан сылдьыбат буоллаҕына социальнай үлэһит өҥөтүн туһаныахтарын сөп, күнү быһа сылдьар буоланнар, чэйдиир, аһыыр усулуобуйалаах. Өйү-санааны уоскутарга, эти-сиини сынньатарга релаксационнай анал оҥоһуулаах уоттаах-күөстээх, муусукалаах, сытан ылар сымнаҕас сирдэрдээх,. Пациеннар итинник сылдьалларын астыналлар. Киэһэ дьиэлииллэр
Верховцева Валентина Николаевна, Дьокуускайдааҕы республиканскай психоневрологическай диспансер диспансернай салаатын сэбиэдиссэйэ.
Диспансер диэн боростуойдук өйдөөтөххө поликлиника, онно пациеннарга амбулаторнай көмө оҥоһуллар. Онно учаастактардааҕы психиатр-быраастар үлэлииллэр. Диспансербытыгар оҕо сулууспата уонна улахан дьон сулууспата диэн көрдөрүнэр, эмтэнэр салаалардаах. Онно бырааска көрдөрүнэргэ “Госуслуга” нөҥүө суруттаран киирэллэр.
Оттон, анал байыаннай дьайыы кыттыылаахтарыгар “зеленый коридор” тутуһуллар. Ол аата кинилэр суруттарбакка да кэлэн, докумуоннарын регистратураҕа көрдөрдүлэр да, уочарата суох быһа сылдьаллар. Быраас көрөр, наада буоллаҕына эмп аныыр, психотерапевт, медицинскэй психолог консультациятыгар ыытар.
Дьон психиатрга көрдөрө тиийэрин куттана саныыр, учуокка ылаллар , барытын былдьыыллар, барытын боболлор диэн. Оннук буолбатах. Учуокка ылыы врачебнай хамыыһыйанан эрэ быһаарыллар дьыала. Пациент, учуокка ылыллыбакка да, амбулаторнайдык эбэтэр күнүскү стационарга эмтэнэр кыахтаах. Эмтэнии көдьүүһүн кэтээн көрөбүт. Оттон бу киһи улаханнык ыалдьыбыт буоллаҕына, врачебнай хамыыһыйаны ааһан, балыыһаҕа сытан тиһиктээх эмтэниини ыллаҕына, оччоҕо эрэ, диспансернай кэтээн көрүүгэ наадыйар эбит диэн врачебнай хамыыһыйа быһаарыытынан, учуокка ылабыт.
Анал байыаннай дьайыы кыттыылааҕар психиатрическай көмөнү оҥоруу туһунан этэр буоллахха, уйулҕата улаханнык хамсаабыт киһиэхэ, олоҕор кутталы үөскэтэр түгэннэрэ баар буолуохтарын сөп, о.э. эйэлээх олоххо төннөн да баран, онно түргэнник киирэ охсубакка, ынарааҥы байыаннай режимигэр сылдьар. Ити стресс да депрессия да буолбатах, ити ПТСР (посттравматическое стрессовое расстройство) диэн ыарыы буолар. Оччотугар итинник ыалдьыбыт киһи күүскэ эмтэниэхтээх, ыарахан туругуттан тахсыахтаах. Итиниэхэ психиатр көмөтө олус туһалаах. Эмтэнэн үтүөрбүт, доруобай олоххо төннүбүт дьон баар. Чугас киһигит итинник турукка тиийбитин биллэххитинэ, куттаммакка эрэ психиатр өҥөтүн туһанарыгар сүбэлээҥ диэн этиэм этэ.
Лазарева Виктория Ивановна-медицинскэй психолог, Москватааҕы медицинский университеты үөрэнэн бүтэрэн кэлэн,диспансерга идэтинэн үлэлээбитэ сыл аҥара буолла:
Мин диспансербыт структуратын туһунаан кылгастык сырдатыам. Хас да аадырыһынан үлэлиибит. Ол иһин дьон мунара-тэнэрэ элбэх.
Диспансер администрацията Лермонтов аат. уул, 178/1 дьиэтигэр баар.
Кылаабынай быраас, сэкирэтээр, экономист, кылаабынай бухгалтер онно олорон үлэлииллэр.
Диспансернай отделениебыт эмиэ ити аадырыска баар. Сэбиэдиссэй, регистратура, психиатрдар кэбиниэттэрэ. Манна диспансер улахан дьоҥҥо сулууспата киирэр: диспансернай кэтээн көрүү, тастан эмтэнии, процедурнай кэбиниэттэрдээх.
Психиатрга көрдөрүнэргэ 122 эрийэн (2) эбэтэр (6) эбиискэлээх нүөмэрдэринэн суруттарыы барар.
Диспансер оҕоҕо сулууспатын салаата Федор Попов аатынан уулусса 16-с №-дээх дьиэтигэр үлэлиир: оҕо психиатр-бырааһын кэбиниэтэ, профилактическай медициинискэй көрүү оҕо психиатр -бырааһын кэбиниэтэ бааллар.
Психотерапевтическай Киин Фёдор Попов аатынан уулусса, 16/4 №-дээх дьиэтигэр үлэлиир. Манна сэбиэдиссэй кэбиниэтэ баар. Кииҥҥэ 122 (3) эрийэн, суруттаран кэлэҕит.
Психологическай көмөнү оҥорор төгүрүк суукка үлэлиир “ТЕЛЕФОН ДОВЕРИЯ» нүөмэрдэрэ: 8 (4112) 50-79-67; 8-800-222-14-07.
Ону таһынан психиатр-быраастар уонна медицинскэй психологтар сааҕа көҥүлү ылыыга уонна тиэхиньикэни ыытыыга медицинскэй көрүүнү ааспытын туһунан ыспараапкалары биэриигэ төлөбүрдээх өҥөлөрө хас да аадырыһынан бааллар: М.Николаев аатынан проспект 38 а дьиэтэ (ЯРНД), Петра Алексеев уул. 83/18 дьиэтэ,( ООО “Невромед”, Пушкин уул., 22 дьиэтэ, 1 этээс, Орджоникидзе уул. 33 корпуһа, 1 этээс.
Бэйэҕэ табыгастаах аадырыска бырааска көрдөрө тиийэргэ электроннай суруттарыы төлөпүөнүн нүөмэрэ (4112) 50-91-68;
Ыарахан ыарыһах сытан эмтэнэр стационарнай балыыһата Котенко уул. 14 дьиэтигэр үлэлиир. Оҕоҕо , улахан дьоҥҥо туһунан отделениелардаах, социальнай реабилитациялыыр палаталардаах. Дьуһуурунай быраастаах.
Сиһилии: https://clck.ru/3QnvwU #ПСИХОЛОГИЧЕСКАЯПОМОЩЬ
#СВОИХНЕБРОСАЕМ