Бөтүҥ дьоно-сэргэтэ былыр-былыргаттан үҥкүүһүттэринэн биллэллэр.

Ону утумнаан буолуо, Бөтүҥ ыччата үҥкүүнэн сөбүлээн дьарыктанар. "Махтал" үҥкүү ансаамбыла норуодунай ааты ылбыта мээнэҕэ буолбатах. Константин Семенович Попов балетмейстер үөрэҕин бүтэрэн дойдутугар Бөтүҥҥэ үлэлии кэлиэҕиттэн Бөтүҥ олохтоохторо эдэрдиин-эмэнниин, оҕолуун-уруулуун үҥкүү кэрэ алыбар ылларан, умсугуйан туран дьарыктаналлар. Араас тэрээһиннэри, кэнсиэрдэри киэргэтэллэр, күөн күрэстэргэ ситиһиилээхтик кытталлар.
Сылын аайы муус устар 29 күнүгэр Бөтүҥҥэ үҥкүү кэрэ бырааһынньыга ыытыллар. Ону дьон-сэргэ өрүү үөрэ-көтө, долгуйа кэтэһэр. Чугастааҕы нэһилиэк дьоно эмиэ кэлэн көрөн астынан, сүргэлэрэ көтөҕүллэн бараллар. Быйыл эмиэ үҥкүү бырааһынньыга бэрт сэргэхтик буолла. Кэнсиэри 3 түһүмэххэ араардылар: 1. Сахалыы үҥкүү. 2. Араас омук үҥкүүтэ. 3. Үһүс түһүмэх Улуу Кыайыы 80 сылыгар ананна. Толору көрөөччүнэн туолбут саалаттан туох эрэ саҥаны, сонуну көрөөрү чоҕулуспут харахтар кэнсиэр аһыллыытын үөрэ-сэгэйэ көрүстүлэр. Бииртэн биир кэрэ көстүүмнээх үҥкүүһүттэр тахсан саҥа, сонун үҥкүүлэри киһи сүргэтэ көтөҕүллэр гына толорбуттарын дохсун ытыс тыаһынан доҕуһуоллаатылар. Ол курдук, "Мичээр" оҕо сайдар киинин иитиллээччилэрэ 2, иитээччилэрэ 2, үһүс көлүөнэ оскуолатын "Талаана" түмсүү "Алгыс" ансаамбыла 3 уонна "Махтал" норуодунай ансаамбылын кыра, орто уонна улахан бөлөҕө барыта 13 үҥкүүнү үрдүк таһымҥа көрдөрдүлэр. Көрөөччүлэр 20 үҥкүү толоруллан бүппүтүн билбэккэ да хааллылар. С.Я.Левин аатынан норуот айымньытын киинин дириэктэрэ Анна Федоровна Яковлева үҥкүү бырааһынньыгынан барыларын эҕэрддэлээн туран ансаамбыл салайааччыларыгар Махтал суругу туттарда. Тэрээһин уопсай хаартыскаҕа түһүүнэн түмүктэннэ.