“Эрэли са5ар эркиннээх”, 2006 с.

“Нам НВК” устуута
Намнааҕы кырдьаҕастар уонна инбэлииттэр олорор интернат дьиэлэрэ 1994 сыллаахха аһыллыбыта. Бу ааспыт 31 сыл устата манна элбэх, доруобуйаларынан хааччахтаах, олохторугар араас ыарахаттары көрсүбүт, оҕото-уруута да суох тулаайах дьон, биир дьиэ-кэргэн курдук олорон аастылар.
Кырдьаҕастары көрөр ыарахан үлэҕэ бүтүн олохторун анаабыт тэрилтэ ветеран үлэһиттэрэ от ыйын 17 күнүгэр Сивцев П.И. аатынан Намнааҕы история уонна этнография музейын үлэһиттэрин ыҥырыытынан кэлэн, сүүрбэччэ сыллааҕыта НВК Намнааҕы филиала устан архивка хаалларбыт интернат үлэтин туһунан видеокиинэтин олус сэргээн, сөҕө көрдүлэр. Киинэҕэ, ол кэмнэргэ бииргэ үлэлээбит үөлээннээхтирин, көрбүт-харайбыт кырдьаҕастарын бу баардыы көрөн-санаан уйадыйан да ыллылар.
Интернат бастакы директора Василий Николаевич Попову, ол кэнниттэн рынок ыарахан кэмнэригэр үлэлээбит директордар Мария Николаевна Охлопкованы, Мария Семеновна Макарованы, кэнники сылларга директордаабыт, элбэхтик үлэ министиэристибэтин, улуус баһылыга Ю. И. Слепцову кытта сүүрэн-көтөн, саҥа, тупсаҕай, аныгылыы киэптээх интернат дьиэтин туттарбыт Анастасия Степановна Заболоцкаяны махтана аҕыннылар, хас биирдии директор тугунан да кэмнэммэт сүрүн кылааттааҕын бэлиэтээтилэр. Интернат аһыллыаҕыттан, Татьяна Викторовна Протопопова бастаан кассирынан, онтон кылаабынай бухгалтерынан үтүө суобастаахтык күн бүгүҥҥэ дылы үлэлии-хамсыы сылдьара ветераннары да үлэһиттэри да барыларын астыннарар. Үлэҕэ ис сүрэхтэриттэн бэриниилээх санитаркалары, бары үлэһиттэри тоһоҕолоон туран аҕыннылар.
Киинэҕэ көстүбүтүн курдук, интернат дьиэҕэ кырдьаҕастарга төгүрүк сыл араас тэрээһиннэр ыытыллаллар. Сыллата оскуола оҕолоро элбэхтик кэлэн концертыыллара, кырдьаҕастары кытта истиҥник кэпсэтэллэрэ, минньигэс аһынан күндүлүүллэрэ үтүө үгэскэ кубулуйбута. Биир оннук үтүө түгэн - улуустааҕы гимназия 5-с кылааһын үөрэнээччилэрэ кэлэн концертыы сылдьаллара көстөр. Оҕолортон ордук чобуолара, лоп-бааччы тыллаах Гоша Протопопов интервьютыгар кырдьаҕастары убаастыыр, ытыктыыр биһиги оҕолор, ытык иэспит диэн эттэ. Кэрэхсэбиллээҕэ диэн Гоша оскуолаҕа улахан кылаастарга да үөрэнэ сылдьан, интернаты кытта ситимин быспатах, сайыҥҥы каникулугар кэлэн манна күүс-көмө буола сылдьыбыт. Гоша бу кыра сааһыттан олоҕу сөпкө сыаналыы, анаара улаатарыгар төрөппүттэрин кылаата улахана саарбаҕа суох. Билигин кини үлэһит үтүөтэ, кэскиллээҕэ буола улаатан, улуус баһылыгын социальнай вопростарга солбуйааччытынан үлэлиир.
Киинэни бэйэтэ сценарийдаан, диктордаан уһултарбыт Майя Христофороваҕа, оператор Кеша Кривошапкиҥҥа устан, биһигини үйэтиппиттэрин иһин ветераннар истиҥ махталларын эттилэр, салгыы да айа-тута сылдьалларыгар баҕа санааларын эттилэр.
Заболоцкая А.С.
#наммузейа #намтүмэлэ #намулууһа