‼Գիտեի՞ք, որ Էջմիածնի Սուրբ Շողակաթ եկեղեցու զանգակատանը կախված զանգերը բերվել են Պարսկաստանի Փերիա գավառի Շուրիշկան եւ Սանգիբարան գյուղերի եկեղեցիներից։

1972 թվականին, այլ սրբությունների հետ միասին Սանգիբարանից Հայաստան է տեղափոխվում նաև այնտեղ 400 տարի պահվող ավետարանը, որը կոչվում է Հովհաննեսի կամ Սանգիբարանի ավետարան: Ավետարանը հայտնի է իր հրաշագործություններով և բազում բժկություններով։ Ավետարանը 12-րդ դարի ձեռագիր է, բաղկացած է 314 թերթից։ Ավետարանի զորությունը հայտնի էր նույնիսկ օտարներին: Երբ պարսիկները գիշերով փորձել են թալանել եկեղեցին, տեսիլք են ունեցել, վախեցել ու փախել։
Ավետարանը Սանգիբարան գյուղում է հայտնվել 1603-1604թթ. պարսկա-թուրքական պատերազմի ընթացքում։
Մաշտոցյան Մատենադարանում պահվող Սանգիբարանի հրաշագործ ավետարանը ամեն տարի Ս. Հովհաննես Կարապետի և Հոբ Արդարի հիշատակության տոնի օրը դուրս է բերվում պահոցից և հանդիսավորությամբ տարվում Շողակաթ վանք, որտեղ մատուցվում է Սուրբ Պատարագ։ Այս տարի տոնը նշվելու է սեպտեմբերի 4-ին։