Таче «Ме марла ойлена» курсым тунем лекше-влаклан сертификатым кучыктеныт.

Ты курсым 2022 ий гыч «Мари ушем» мер организаций эртара (вуйлатышыже Василий Петров). Занятий-влак Йошкар-Олаште Калыкле тӱвыра пӧртыштӧ эртеныт.
Гуманитарный полышым коштыктышо рвезе-шамыч тидым ышташ таратеныт, молан манаш гын СВО кайыме верыш полышым намийыше руш, чуваш да моло калык шке землякышт дене шочмо йылмышт дене кутырат гын, мемнан кундем гыч ятырын марий йылмым начарын палат улмаш, сандене тунемаш кумылышт лектын.
Эн ончыч проектым возымо, сеҥышыш лекме, вара илышыш шыҥдарыме.
Ты курсыш гуманитарный полышым коштыктышо Золотухин Роман Владимировичат ушнен.
Кок туныктышо лийын: Максимов Валерий Николаевич ден Иксанова Лидия Геннадьевна.
Кок тунемме группо лийын. Курсышто руш, украин, татар, чуваш, казах калык-влак кокла гыч лекше-влак шинчымашым погеныт. Чылажге 70 наре еҥ курсыш возалтын да 56 тунемше сертификат дене палемдалтын.
Дарья Быкова. Авторын фотожо-влак.