Келин бўлиб суйдирган,

Гап қайтариб куйдирган,
Кетиб қолиб тўйдирган,
Келиним келин олди.
Етти ёққа зир чопиб,
Чиройли бир қиз топиб,
Пешонасидан ўпиб,
Келиним келин олди.
Ниҳоят у жанона,
Ўзи бўлди қайнона,
Келинига парвона,
Келиним келин олди.
Мақтанар: “Келин болам,
Чиройли ўзимдан хам,
Шахло кўз, қоши қалам,
Келиним келин олди.
Юзларидан ёғар нур,
Лаби ғунча, тиши дур”,
Дедим: “Хали шошмай тур”,
Келиним келин олди.
Ғунча лаб бир очилсин,
Захарлари сочилсин,
Тиғи жонга санчилсин,
Келиним келин олди.
Мушугини дегин “пишт”,
Чумчуғини дегин “кишт”,
Ана қиёман-уриш,
Келиним келин олди.
Шаҳло кўзлар ўқрайиб,
Хар кўрганда хўмрайиб,
Найзасин турсин сайиб,
Келиним келин олди.
Чимирилиб қалам қош,
Юрагингни қилсин ғаш,
Вақтинча ўпиш, ялаш,
Келиним келин олди.
Ўзингдай идиш ювса,
Қолмайди бутун коса,
Чойнагинг тутар хасса,
Келиним келин олди.
Қўполлигидан уни,
Чангютгичми, дазмолми,
Бузилиб битар куни,
Келиним келин олди.
Уч кунлаб кир увитсин,
Сочиқларни чиритсин,
Бир кўнглингни совутсин,
Келиним келин олди.
Гап бермасдан ўзингдай.
Сайраб турсин булбулдай,
Томошангни бир кўрай,
Келиним келин олди.
Углингга гап ўргатсин,
Ялласига ўйнатсин,
Сани ёмон кўрсатсин,
Келиним келин олди.
Бошлаб уйда талотум,
Овсинга килса хужум,
Дейман: “Саломалайкум!”
Келиним келин олди.
Сўлитиб гулзорингни,
Чайкасин рўзғорингни,
Шу киз берсин додингни,
Келиним келин олди.
Энди биласан, мана,
Қайнона бўлиш нима,
Ажабгина бўлди-я,
Келиним келин олди.
Тавба, тавба, нима бу?
Юрагимда кек, қайғу,
Ахир уйимда тўй-ку,
Келиним келин олди.
Ўзинг кечиргин Худо,
Инсон бўлмас бехато,
Шукур деб қилай дуо,
Келиним келин олди.
Ахир унда ёш эди,
Йўнилмаган тош эди.
Беақл, бебош эди,
Келиним келин олди.
Секин гапириб мақтаб,
Дуолар қилиб алқаб,
Йўлга солдим-ку алдаб,
Келиним келин олди.
Дедим: “Тежамкор болам,
Менга мададкор болам,
Ўргилай, онам-онам”,
Келиним келин олди.
“Кир ювар оппоқ-оппоқ,
Идишим ушар юмшоқ,
Миннатдор коса, тавоқ”,
Келиним келин олди.
Қилиб сабру-бардошни,
Кўздан оқизмай ёшни,
Пиширдим шу хом ошни,
Келиним келин олди.
Сабр қилдим Мархабо,
Ғўрадан битди холво,
Энди қилайин дуо,
Келиним келин олди.
Ёмон келин дўзаҳдир,
Яхши келин жаннатдир.
Илоё кўрсин хузур,
Келиним келин олди.