Сайын ямдылалтме

Марий Элыште 3 майлан 20,3 тӱжем гектарыште икияшым ӱдымӧ. Тидыже палемдыме пӱтынь кумдыкын 13 процентше лиеш. Кодшо ийын тиде кечыланак урлыкашым 76,7 тӱжем гектарыш вераҥдыме ыле.
Чӱчкыдын толшо йӱр пасу пашам ворандарен колташ чаракым ышта. Сандене техникым тӱрыс куатын кучылташ кызытеш йӧн уке.
Шошо агалан кузе ямдылалтме нерген Марий Элым вуйлатыше Юрий Зайцев ялозанлык да кочкыш сату министр Андрей Кондратенко дене мутланен. Регионын ялозанлык да кочкыш сату министржын уверже почеш, шошо агалан 100 наре процент техникым ямдылыме. Идалык тӱҥалтыш гыч шотлымаште 157 единице техникым да оборудованийым налме, 7 тӱжем тонн минерал ӱяҥдышым, 500 наре тонн сай качестван урлыкаш пырчым кондымо.
35 тӱжем тонн пырчан да отызан кушкылын урлыкашыжым ямдылыме, кӱлешыже – 25 тӱжем тонн. Кокияш пырчан культурын урлыкашыжым 9,8 тӱжем тонным шапашлыме. Тидыже палемдыме деч 1,2 тӱжем тоннлан шукырак.
Тений тӱшка ден фермер озанлыклаште чылаже 160 тӱжем гектар икияшым ӱдыман. Тидыже кодшо ийысын 103 процентше лиеш. Тышечын пырчан да отызан кушкылым 98, 6 тӱжем гектарыш, ӱйлык кушкылым – 13 тӱжем, кормалык кушкылым 43,6 тӱжем, пареҥгым – 2 тӱжем, пакчасаскам 1,8 тӱжем гектарыш вераҥдыман.
Марий Эл вуйлатышын пресс-службыжын уверже негызеш В.Смоленцев ямдылен.
Д.Речкинын фотожо