Уйқу йўқми дўстим бу оқшом,

Нега яна хомушсан бу пайт.
Ёки яна олис юртларда,
Ўз юртингни соғиндингми айт?
Ўзга юртда юрагинг тиғлаб,
Қўмсадингми, қишлоқ хавосин?
Бугун яна кўзларинг намлаб,
Соғиндингми, она овозин?
Дўстим, нега ғамгинсан бугун,
Нега яна бетартиб хонанг?
Узок юртда бўлганинг учун
Тушларингга кирдими онанг?
Ох урасан, осмонга қараб,
Охларингда соғинч иси бор.
Яқинларинг дийдорин истаб,
Яна тунинг ўтдими бедор?
Юрагингга тўлганда алам,
Топилмайди кўнгил овунчи.
Ёмон экан дўстим жуда ҳам,
Олисларда Ватан соғинчи!