МАШИНА АЙДОО АЙЫМДАР УЧУН ЭМЕСПИ??

Жолдо кетип баратканда эрежелерди бузуп бараткан машинаны көрсө эле "рулда аял болсо керек", "ушуларды машинага жолотпош керек" деген эркектердин наалыма сөздөрүн угуп жүрсөңүз керек. Анан эле айымдар чындыкты талашып чыркырап жатып калышат. Бүгүн ушул туурасында кеп кылабыз. Чын эле аялзаты автону туура айдай албайбы, же бул жөн гана мырзалардын көрө албастыгыбы?
Анекдот
Экзамен тапшырып, айдоочу күбөлүгүн алууга кеткен кызы үйүнө бети-башы көгөрүп келип калат.
Атасы: -Ии кызым, тапшырдыңбы?
-Ооба.
-Анан?
-Биринчи кайрылыштан жүк ташуучу унааны сүзүп алдым...
-Анда өтпөй калган турбайсыңбы?
-Ой билбейм, ата. Өттүмбү, жокпу уккан жокмун. Инструктор айтканга жетишпей өлүп калды.
Адистин ою
Кызды ата-энеси кичинесинен эле эркек баладан айырмалап, насаат сөздөрдүн гүлүн терип, назик, мээримдүү болууга тарбиялары белгилүү. Мисалы, кызга келечекте эне болоорун белгилеп куурчак алып беришет. Аялзатына тиешелүү нерселер менен ойноп, ал эне, кожойке болууга үйрөнөт. Ошону менен кыздын да, ата-эненин да, коомдун да түшүнүгүндө "аял аялга гана тиешелүү иш менен алек болуусу шарт" деген жаңылыш стереотип пайда болуп калган. Чындыгында аялдардын арасында авто унаасын бир да жолу кырсыкка учуратпаган өтө кылдат айдоочулар дагы кездешет. Ал эми айрым учурда эң жөнөкөй жагдайда унааны туура эмес башкарып, башкаларга ыңгайсыздык жараткан аялзатын көрүп калабыз. Буга таңгалып кереги жок. Аялзаты эркекке салыштырмалуу чукул кырдаалда тез чечим кабыл ала албайт. Өтө эмоционалдуу келип, кичинекей нерсени паникага айландырып ийиши мүмкүн. Мындай нерсе жаратылышта мыйзамченемдүү көрүнүш.
Аялдар үчүн автолор
Белгилүү болгондой, машина биринчи эркектер үчүн чыгарылган. Ошон үчүн ал эркекке ылайыкташтырылып жасалган. Бирок акыркы жылдары дүйнөлүк авто өндүрүүчү компаниялар айымдардын да суроо-талабын эске алып, аял кишиге кадыресе ыңгайлуу автолорду чыгара башташты. Мисалы, автонун сырткы көрүнүшүнөн баштап коопсуздук "басмайылына" чейин аял затынын мүнөзүн толуктап туруучу мүнөзгө ээ болду.
Аял машинаны айдаганды гана билет
Эркектерге салыштырмалуу аялдар автонун кызматын гана пайдаланышат. Мисалы, керектүү жерге жетип алуу, эс алууга чыгып келүү жана убакытты үнөмдөөчү каражаты катары. Аларда айдаган автосун оңдомой деген сапат кездешпейт. Буга таң калуунун кажети жок. Анын бузулган жерин оңдоп берүү үчүн жолдошу же атайын авто оңдоочу жайлар бар эмеспи.
Коркуу уят эмес
Авто унаа башкарып баратканда жаралган коркуу сезими кадыресе көрүнүш. Ар бир акыл-эси ордундагы адам сактанып жана жанындагы адамдардын өмүрүнө өзүнүн жоопкерчилигин сезип, дайыма коркуу сезиминде болуш керек. Бул сезимди моюнга алуудан уялуунун кереги жок. Анткени келерки кайрылыштан сага окшоп "коркпогон" бирөө чоң ылдамдыкта чыга калбашына эч ким кепилдик бере албайт. Автону башкаруу оңой эмес. Муну ар бир айдоочу мойнуна алышы шарт.
Ишенимдүү колго тапшырыңыз
Машинаны ишенимдүү бир же эки оңдоочуга гана көрсөткөнгө аракет кылыңыз. Мындай учурда сиз кайрылып жүргөн адис унаанын абалын жакшы билип калат. Анүстүнө келерки репутациясы үчүн мыкты кызмат көрсөткөнгө аракет жасайт. Ал эми орто жерден чыга калган "жардамчылар" сиздин машинаны жакшы билбегениңизден пайдаланып, тетиктерин алмаштырып, пайда эмес, тескерисинче, зыян келтирип коюшу толук ыктымал.
"Биз рулда экөөбүзбүз!"
Акыркы мезгилдерде шаардын көчөлөрүнөн "Биз рулда экөөбүзбүз" деген жазуусу бар автолорду байкап жүрөбүз. Башында бул тамашадай сезилиши мүмкүн. Бир аздан кийин гана рулда кош бойлуу аял экенин байкайсың. Боюнда бар айымдар сөзсүз ушул жазууну жазып алышса жакшы болчудай. Анткени жаратылыштын мындай белеги эч кимди көңүл кош калтырбайт. Ошол замат сизге катар кетип бараткан айдоочулар жол бошотуп же кылдаттык менен мамиле кыла баштаганын байкайсыз.